Foto: Polisia.kz
Ishki ister ministrligi politsiia qyzmetkerine qarsy kúsh qoldanǵany úshin qandai jaza qarastyrylǵanyn aitty, dep habarlaidy "Ult aqparat" Polisia.kz saityna silteme jasap.
Otbasyndaǵy zorlyq-zombylyq – bul jurtshylyqty alańdatatyn ózekti problema. Qanshama adam jaqynynyń qysymyna shydap, qorlyq pen qol kóterýge tózip keledi. Alaida munyń sońy aýyr zardaptarǵa ákeletinin umytpaý qajet.
Qoǵam qasiretine ainalǵan bul máseleni sheshý maqsatynda Memleket basshysy turmystyq zorlyq-zombylyq úshin jazany qatańdatýdy tapsyrdy.
"Qazir mundai quqyq buzýshylyqtar jábirlenýshiniń aryz-shaǵymynsyz tirkeledi. Endi agressor aryz tússe de, túspese de, jaýapqa tartylady. Keide jábirlenýshini “úi agressorynan” qutqaramyn dep, qyzmetkerler óz ómiri men densaýlyǵyna qaýip tóndiredi", – dedi IIM ákimshilik politsiia komiteti basqarma bastyǵynyń orynbasary Azamat Qurymbaev.
Máselen, Batys Qazaqstan oblysynda mas er adam úiinde janjal shyǵaryp, áieli politsiia shaqyrǵan. Tártip saqshylary oqiǵa ornyna jetkende “agressor” óz úiiniń aýlasynda olarǵa qarsylyq kórsetip, zańdy talaptarǵa baǵynbaǵan. Tipti, qyzmetkerlerdiń birin pyshaqpen jaralamaq bolǵan.
IIM baspasóz qyzmeti málimetinshe, jyl basynan beri bilik ókiline qarsy kúsh qoldanýdyń 146 faktisi tirkelip, 109 adam túrli jaýapkershilikke tartylǵan, onyń ishinde 19-y bas bostandyǵynan aiyryldy. Sot sheshimimen quqyq qorǵaý organy qyzmetkeriniń zańdy talabyna baǵynbaǵany úshin 1699 adam ákimshilik jaýapkershilikke tartylǵan, onyń ishinde 792 quqyq buzýshy qamaýǵa alyndy.
"Ishki ister organdary qyzmetkerleri qoǵamdyq tártipti qamtamasyz etý maqsatynda, iaǵni sizdiń qaýipsizdigińizdi qamtamasyz etý úshin óz ómirlerin qaýipke tigip, aianbai qyzmet etedi. Osyǵan bailanysty politsiia qyzmetkerleriniń zańdy talaptaryn oryndaýdy, olarǵa jumys barysynda kedergi keltirmeýdi suraimyz. Bundai áreketterge jol bergen jaǵdaida qylmystyq jáne ákimshilik jaýapkershilik kózdelgenin eske salamyz. Jaza iri aiyppuldan 7 jyl merzimge deiin bas bostandyǵynan aiyrýdy kózdeidi. Sonymen qatar politsiia qyzmetkerleriniń is áreketinde zań buzýshylyq oryn alǵan bolsa, azamattar shaǵymdanýǵa quqyly", – deidi Azamat Qurymbaev.
