QR Bilim jáne ǵylym ministri Ashat Aimaǵambetov búgin Facebook-tegi paraqshasynda pedagog mártebesin kóterý boiynsha qandai jumystar atqarylatynyn aityp berdi, dep habarlaidy "Ult aqparat".
«Memleket basshysy Qasym-Jomart Toqaev ministrlikke «Pedagog mártebesi týraly» zań normalaryn iske asyrý boiynsha atqarylyp jatqan jumystardy jalǵastyrýdy tapsyrdy. Atalǵan qujattyń mańyzdy erejeleriniń biri – pedagogti mindetine jatpaityn fýnktsiialarǵa tartýdan qorǵaý, orynsyz eseptilikten bosatý. Bul normalar jańa oqý jyly qarsańynda óte ózekti», - dep jazdy ministr.
Ministrliktiń osyǵan qatysty qatań ustanymdaryna qaramastan, ministr osy erejelerdi buzý faktileri áli de kezdesetinin aitty.
«Osydan birneshe apta buryn Lengir mektep-internatynda ákimshilik is qozǵaldy, onda pedagogterdi laýazymdyq mindetterine kirmeitin jumystarǵa tartqan. Bilim salasynda sapany qamtamasyz etý departamenti oqiǵa ornyna baryp, qyzmettik tekserý júrgizdi. Faktiler rastaldy jáne mektep direktorynyń mindetin atqarýshy . ákimshilik jaýapqa tartyldy», - deidi A. Aimaǵambetov.
Buǵan deiin Túrkistan oblysy Kentaý qalasyndaǵy Molda Musa atyndaǵy mektepte de qyzmettik tekserý júrgizilgen.
«Onda muǵalimdi mektepti jóndeý jumystaryna tartqan. Atalǵan fakti tekserý barysynda rastaldy. Mektep direktorynyń mindetin atqarýshy da, Kentaý qalalyq bilim bóliminiń qyzmetkeri de ákimshilik jaýapqa tartyldy. Jalpy osy qysqa ýaqyttyń ózinde Bilim salasynda sapany qamtamasyz etý jónindegi aýmaqtyq departamentterge júzden astam ótinish kelip tústi. Nátijesinde laýazymdy tulǵalarǵa da, oqýshylardyń ata-analaryna da qatysty 30-dan astam ákimshilik jaza qoldanyldy. Bul jumys turaqty túrde júrgiziledi. Zańsyzdyqqa jol bergen jaýapty tulǵalarǵa qatysty sharalar munymen shektelmeidi. Ákimshilik jazalardan bólek, jumystan bosatý týraly sheshimder de qabyldanady», - deidi vedomstvo basshysy.
«Muǵalimderdiń quqyǵyn qorǵaý – jergilikti aýmaqtyq organ basshylarynyń da, mektep direktorlarynyń da tikelei mindeti. Pedagogterdiń quqyqtaryn qorǵaý týraly aitqanda, muǵalimder óz mindetterin adal oryndaý máselesin de este saqtaýy qajet. Óitkeni jańa Zańnyń talaptary da jańa. Pedagogikalyq qyzmetpen ainalysatyn árbir jan jas urpaqqa úlgi bolyp, óz jumysynda adamgershilik qaǵidalary men moraldyq qundylyqtardy basshylyqqa alýy tiis. Minez-qulyq mádenieti, ádeptilik, adaldyq, adamnyń ar-namysy men qadir-qasietin qurmetteý – pedagogikalyq etikanyń negizi. Osy qaǵidalardyń saqtalýyn baqylaý úshin biz muǵalimderge qatysty quqyqbuzýshylyqtar men pedagogikalyq etikany óreskel buzý týraly daýly máselelerdi qarastyratyn arnaiy alqaly organ qurýdy qarastyrýdamyz. Bul – pedagogikalyq etika jáne muǵalimderdiń quqyqtaryn qorǵaý jónindegi keńes.
Mundai institýt alǵash ret pilottyq rejimde osy jyldyń tamyz aiynan bastap, Nur-Sultan qalasynda jumys isteýdi bastady.
«Bolashaqta etika boiynsha Keńester elimizdiń barlyq aimaǵynda quryla alady. Olar bilim berý salasynda sapany qamtamasyz etý departamentteri janynda jumys isteitin bolady. Barlyǵymyz memlekettik qyzmetkerlerdiń Ádep jónindegi keńesiniń tiimdi jumysynyń kýási boldyq. Bizdiń jańadan qurylǵan Keńesterimizdiń qyzmeti sonyń úlgisi boiynsha uiymdastyrylady. Munyń bári – úlken bastama: ár muǵalim óziniń mártebesin maqtan tutýy kerek. Yńǵaily jaǵdaida jumys istep, sapaly bilim berýi kerek. Óitkeni bizdiń balalarymyzdyń ál-aýqaty men bilimi ustazdardyń qolynda», - deidi Bilim jáne ǵylym ministri.
