El Prezidentiniń tapsyrmasyn oryndaý maqsatynda Úkimet qaýlysymen Qazaqstan Respýblikasy Parlamentiniń janynan Parlamentarizm institýty quryldy. Bul týraly Senat jáne Májilistiń baspasóz qyzmetteri habarlady.
«Memleket basshysy óziniń 2019 jylǵy 2 qyrkúiektegi Qazaqstan halqyna arnaǵan Joldaýynda Parlament janynan zańdardyń sapasyn arttyrýǵa yqpal etetin tiisti qurylym qurýdy tapsyrdy.
Úkimet Parlamentpen birlesip Parlamentarizm institýtyn qurý úshin qajetti sharalar qabyldady.
Jańa qurylym qyzmetiniń negizgi nysanasy – zańnamanyń tiimdiligin taldaýdy (normativtik quqyqtyq aktilerdi taldaý) qamtamasyz etý, Qazaqstan Respýblikasynyń zańnamasyn damytýdyń ǵylymi tujyrymdamalaryn ázirleý arqyly Qazaqstan Respýblikasynda parlamentarizmdi damytý jáne onyń tiimdiligin arttyrý.
Osyndai institýttar birqatar damyǵan elderdiń zań shyǵarýshy organdarynyń janynda jumys isteidi. Olardyń jumysy qabyldanatyn zańdardyń sapasyn qamtamasyz etý qajettiligine tikelei bailanysty. Zań jobalaryn muqiiat pysyqtaý naqty salalarda arnaiy bilimdi talap etedi», - delingen qos palata taratqan aqparatta.
Málim etilgendei, Parlamentarizm institýty depýtattarǵa kelesi máseleler boiynsha járdemdesetin bolady: zańnamaǵa ózgerister engizý qajettiligin ǵylymi negizdeýdi, jańa normalardy engizýdi, zań jobalarynyń ózin ázirleýdi jáne qajet bolǵan jaǵdaida qarjylyq-ekonomikalyq esepterdi daiyndaýdy, sondai-aq zańdardy iske asyrýdyń yqtimal ekonomikalyq, áleýmettik, zańdyq, ekologiialyq saldarlarynyń boljamdaryn ázirleýdi qosa alǵanda, olardyń zań shyǵarý bastamasy quqyǵyn iske asyrýǵa.
«Munda depýtattyq korpýspen birge Úkimettik nusqalarǵa balamaly zańnamalyq normalar ázirlenetin bolady. Bul qabyldanatyn zańdardyń sapaly pysyqtalýyna yqpal etedi.
Budan basqa, jańa qurylym Memlekettik basqarýdyń tiimdiligin arttyrýdyń quqyqtyq tásilderin zerdeleýmen, ekonomikalyq jáne qoǵamdyq ómir salalaryn zańnamalyq retteýdi ońtailandyrý jóninde usynystar ázirleýmen, sondai-aq qoldanystaǵy zańnamanyń tiimdiligin taldaýmen ainalysady.
Sondai-aq, institýt zańnamany jetildirý boiynsha usynystar ázirleý, damyǵan shet elder parlamentshileriniń tájiribesin zerdeleý úshin qoǵamda áleýmettik jáne saraptamalyq saýalnamalar júrgizetin bolady.
Aldaǵy kezeńde jańa qurylym memlekettik tirkeý rásiminen ótip, onyń Jarǵysy bekitiledi.
Institýttyń qyzmeti qosymsha qarjylyq shyǵyndardy talap etpeidi, óitkeni ol kózdelgen biýdjettik shyǵystar sheńberinde júzege asyrylady», - delingen baspasóz baianynda.
.jpeg)