Elimizde para alý faktileri jiilep ketti: bul kórsetkish bir jylda 11%-ǵa artqan. Memlekettik qyzmet pen memlekettik basqarý múddelerine qarsy sybailas jemqorlyq jáne basqa da qylmystyq quqyq buzýshylyqtardyń úshten ekisi paraqorlyqqa tiesili, dep habarlaidy Finprom.kz portaly.
2020 jyldyń qańtar-tamyz ailarynda elimizde memlekettik qyzmet pen memlekettik basqarý múddelerine qarsy 1,6 myń sybailas jemqorlyq jáne ózge de qylmystyq quqyq buzýshylyq tirkeldi. Bul bir jyl burynǵy kórsetkishpen salystyrǵanda 12,6%-ǵa tómen.
Olardyń úshten ekisin para alý oqiǵalary qurap tur. Jyl bastalǵaly elde 993 para alý oqiǵasy tirkeldi – 2019 jyldyń osy kezeńimen salystyrǵanda 11,4%-ǵa kóp.
Onyń ishinde 555-i – para alý, 404-i – para berý, 34 jaǵdai – deldaldyq oqiǵasy.
Aimaqtar boiynsha para alý oqiǵalarymen Batys Qazaqstan oblysy «kóshbasshy» bolyp tur – 97 jaǵdai, jyldyq ósim birden eki esege artty.
Ekinshi jáne úshinshi oryndarda Almaty (87 jaǵdai, 47,5%) jáne Shyǵys Qazaqstan (76 jaǵdai, minýs 3,8%) oblystary tur.
