«Men sheteldik saiasatkerlerdiń Qazaqstanda orys tiline jáne ózge de tilderge qatysty úrei bar degen ýájderin narazylyqpen qabyldaimyn». Qazaqstan Halyqaralyq «Qazaq tili» qoǵamy» qoǵamdyq birlestiginiń vitse-prezidenti Maksim Rojin osyndai paiym aitty, dep habarlaidy QazAqparat.
«Búginde elimizde memleket tarapynan kez kelgen etnosqa óziniń tilin, óziniń mádenietin bilýge barlyq jaǵdailar jasalǵan. Onyń bir dáleli, elimizde orys, ózbek, aǵylshyn, nemis tilinde jumys isteitin orta mektepter bar. Álemde memlekettik biýdjet qarjysynan balalardy týǵan tilinde oqytýǵa aqsha bóletin elder saýsaqpen sanarlyq shyǵar. Meniń oiymsha, Qazaqstan – sondai memleketterdiń biri. Oǵan bizdegi orys tilinde, aǵylshyn tilinde, nemis, ózbek tilderinde bilim beretin mektepter mysal bola alady.
Sondyqtan men sheteldik saiasatkerlerdiń Qazaqstanda orys tiline jáne ózge de tilderge qatysty úrei bar degen ýájderin narazylyqpen qabyldaimyn. Men tegi orys qazaqstandyq retinde ondai replikalarǵa jol joq dep esepteimin. Bul elimizdegi shynaiy kórinisti burmalap kórsetý ekenine senimdimin», - dedi ol Qazaqstan halqy Assambleiasynyń HHHI sessiiasynda.
Sondai-aq, ol halyqtyń memlekettik tilge bet burǵanyn, osy tendentsiiadan memlekettik qyzmetshiler de qalyspaýy kerektigin atap ótti.
«Biz qazir Halyqaralyq qazaq tili qoǵamy arqyly tilge arnalǵan Kórneki jobany bastap jatyrmyz. Bul joba kórneki aqparat týraly zańynyń talaptaryn shaǵyn jáne orta bizneske túsindirip, oryndaýǵa erikti túrde kómektesedi. Qoǵam qazaq tiline kóship jatqanda bul talap memlekettik qyzmetkerler úshin de kúsheiýi kerek dep sanaimyn. Sebebi qazaq tili qazir qoǵamnyń negizgi tiline ainalyp keledi. Bul – halyqtyń talaby. Sondyqtan memlekettik qyzmetshiler qazaq tilinen tapsyratyn emtihan nátijesi eseptelýi kerek dep esepteimin», - dedi Maksim Rojin.
