Otbasyn qoldaý jónindegi memlekettik baǵdarlama ázirleý qajet. Mundai pikirdi M.Áýezov atyndaǵy Ádebiet jáne óner institýtynyń direktory Kenjehan Matyjanov bildirdi, dep habarlaidy QazAqparat.
«Álem elderi eki úlken júiege bólinip otyr. Birinshisi - anglo-saksondyq júie, ekinshisi - shyǵystyq júie. Sonymen qatar shyǵystyq júiege skandinaviialyq elder qosylady. Bulardyń bilim berý, tárbie berý isindegi eń basty trendi - tárbiege beriledi. Sondyqtan bizdiń qazirgi memlekettik bilim berý jáne tárbie saiasatynda osy trendke, aldymen, tárbieni shyǵarýymyz kerek. Sonda ǵana jastarymyzdyń, bolashaq qoǵamnyń bolmysynyń alǵysharttary qalyptasady», - dedi ol Otbasy kúni aiasynda ótken dóńgelek ústel otyrysynda.
Onyń paiymynsha, otbasynyń negizgi túbirin kapitalizm joiyp jiberdi. Kapitalizm paida bolǵannan keiin jurt balalaryn otbasynan ajyratyp, balabaqshaǵa, mektepke berdi. Sóitip, ata-analar bala tárbieleý isin balabaqsha men mektepke artyp qoidy.
«Al qazirgi pandemiia kezeńinde búkil álem ózderiniń burynǵy memlekettik saiasattaryn qaita qarap jatyr. Demek, qazir otbasyna úlken salmaq túsip otyr. Balany oqytý da, tárbieleý de ata-ananyń moinyna artyldy. Endi biz qalasaq ta, qalamasaq ta otbasyna kómek kórsetýdi oilastyrýymyz kerek. Menińshe, Memleket basshysynyń ótkendegi Joldaýyn negizge ala otyryp, memlekettik turǵydan otbasyn qoldaý jónindegi baǵdarlama jasaqtaǵan durys bolar edi», - dedi Kenjehan Matyjanov.
