Jyl basynan beri Aýyl sharýashylyǵy ministrliginiń memlekettik inspektorlary respýblikanyń fitosanitarlyq baqylaý beketterinde 88 myńnan astam kólik quralyn, onyń ishinde 68 myńǵa jýyq avtokólik, 17 myń vagon, 4 myń áýe jáne 100-den astam teńiz ben ózen kemelerin tekserdi, dep habarlaidy "Ult aqparat".
Jyl basynan beri importtalǵan ónimderdi tekserý nátijesinde ósimdikter karantini salasyndaǵy zańnamany buzý boiynsha 1969 oqiǵa anyqtaldy. Onyń ishinde karantinge jatqyzylǵan ónimderge fitosanitarlyq sertifikattyń joqtyǵy boiynsha - 1522 oqiǵa, karantindik nysandardy anyqtaý boiynsha - 29 oqiǵa, fito-sertifikattar sáikessizdigi - 36, fitosanitariialyq talaptardy buzýdyń - 96 jáne tyiym salynǵan ónimdi ákelýdiń 5 faktisi tirkeldi.
555 jaǵdaida karantinge jatqyzylǵan ónim júk jóneltýshi elderge qaitaryldy, taǵy 9 joiyldy. Sonymen qatar, 1,5 myń jeke jáne zańdy tulǵaǵa 91 895 338 teńge kóleminde aiyppul salyndy. Al 2019 jyly 2,3 ese az tárkilenip, 38,6 mln teńge óndirildi.
Ósimdikter karantini zańnamasyn buzǵany úshin júk jóneltýshi elderge 177 notifikatsiia jiberildi.
Biyl Qazaqstannyń ósimdik sharýashylyǵy ónimderiniń eksporty - 7 mln tonnaǵa jýyq, al respýblikaǵa import 1,6 mln tonnany qurady.
Fitosanitarlyq baqylaý qyzmetiniń jumysy 2019 jyldyń 28 qazanynda Qazaqstanda «AÓK retteý máseleleri boiynsha QR keibir zańnamalyq aktilerine ózgerister men tolyqtyrýlar engizý týraly» Zań qabyldanǵan soń aitarlyqtai jaqsardy. Jańa zańnama ósimdikter men ósimdik sharýashylyǵyn qorǵaýdy nyǵaitý maqsatynda ósimdikter karantini jónindegi memlekettik inspektorlardyń qyzmetin keńeitti.
Atap aitqanda, olarǵa fitosanitarlyq baqylaý beketindegi tekserý jáne karantindik fitosanitarlyq saraptama jáne zerthanalyq saraptama júrgizý kezinde kólikti toqtatý jáne karantinge jatqyzylǵan ónim men memlekettik karantindik fitosanitariialyq baqylaý nysandaryn ustaý quqyǵy berildi.
Esterińizge sala keteiik, memlekettik karantindik fitosanitariialyq baqylaýdy fitosanitariialyq baqylaý beketterinde ósimdikter karantini jónindegi memlekettik inspektorlar júzege asyrady. Olardyń qyzmeti Qazaqstan Respýblikasynyń aýmaǵyna karantin ónimderiniń ákelinýi men taralýyna jol bermeýge baǵyttalǵan.
Qazir respýblikada 26 syrtqy jáne 52 ishki fitosanitariialyq baqylaý beketi jumys isteidi. Atap aitqanda, RF jáne QR shekaralas aimaqtarda karantin baqylaýyn kúsheitý úshin 32 beket ashyldy.
