Jyl basynan beri qazaqstandyqtarǵa 234,7 milliard teńgeden astam zeinetaqy tólendi. Zeinetaqynyń ortasha mólsheri 105 myń teńgeden asty, dep habarlaidy Sputnik Qazaqstan.
Eńbek jáne halyqty áleýmettik qorǵaý ministrligi baspasóz qyzmetiniń málimetinshe, biyl qańtarda respýblikalyq biýdjetten zeinetaqy tólemderine 234,7 milliard teńgeden astam, onyń ishinde bazalyq zeinetaqyǵa 71,3 milliard teńge, yntymaqty zeinetaqyǵa 163,4 milliard teńge baǵyttaldy.
Vedomstvo aqparatynsha, búginde Qazaqstanda 2 million 245 myń zeinetker turady.
"1 aqpandaǵy jaǵdai boiynsha zeinetaqy tólemderiniń ortasha mólsheri (bazalyq zeinetaqyny qosqanda) 105 291 teńgeni qurady", - delingen habarlamada.
Aita keteri, 2018 jyldyń birinshi shildesinen bastap memlekettik bazalyq zeinetaqy tólemi ár alýshyǵa onyń zeinetaqy júiesindegi tájiribesin eskere otyryp, jeke taǵaiyndalady.
Eger zeinetaqy júiesindegi jumys ótili 10 jyl nemese odan az bolsa, sondai-aq eger múlde joq bolsa, bazalyq zeinetaqy eń tómengi kúnkóris deńgeiiniń 54%-in quraidy. Sodan keiin 10 jyldan asqan ár jyl úshin onyń mólsheri 2%-ke artady. Mysaly, 20 jyl jumys ótili bolsa, bazalyq zeinetaqy kúnkóris deńgeiiniń 74%-in, 30 jylda kúnkóris deńgeiiniń 94%-in quraidy. 33 jáne odan da kóp jyl jumys ótili bolsa, kúnkóris deńgeiiniń 100%-i mólsherinde belgilenedi.
Eger bir ai ishinde Biryńǵai jinaqtaýshy zeinetaqy qoryna MZJ birneshe ret aýdarylsa, jinaqtaýshy júiege qatysý merzimi bir aidy quraidy.
Osylaisha mindetti zeinetaqy jarnalary neǵurlym turaqty jáne tolyq salynsa, zeinetaqy jasyna jetkende bazalyq zeinetaqy soǵurlym kóp bolady.
