Qazaqstanda ortasha ómir súrý uzaqtyǵyn 2025 jylǵa deiin 75 jasqa jetkizý kózdelip otyr. Qazirgi kórsetkish – 73 jas, dep habarlaidy QazAqparat.
«Qazirgi tańda Parlamentte halyqtyń densaýlyǵy jónindegi Kodeks qaralyp jatyr. Ol kodekstiń negizgi maqsattary - meditsina qyzmetkerleriniń mártebesin kóterý, qazaqstandyqtardyń densaýlyǵyn nyǵaitý, tsifrly densaýlyq saqtaý salasyn engizý jáne baqylaýdy kúsheitý. Úkimet densaýlyq saqtaý salasyn 2025 jylǵa deiin damytý jóninde memlekettik baǵdarlama qabyldady. Basty mindet – qazaqstandyq ómir jasynyń uzaqtyǵyn arttyrý. Búgingi kúni bul kórsetkish 73 jas bolsa, 2025 jylǵa deiin ómir uzaqtyǵyn 75 jasqa deiin jetkizý kózdelýde. Ol úshin Úkimet pen jergilikti atqarýshy organdardyń basty mindeti – kórsetiletin meditsinalyq qyzmettiń sapasyn arttyrý, materialdyq-tehnikalyq bazany jaqsartyp, meditsina qyzmetkerleriniń ailyǵyn kóterý, memlekettik-jekemenshik áriptestikti artyryp, salaǵa investorlar men demeýshilerdi tartý», - dedi Úkimet basshysynyń orynbasary Berdibek Saparbaev OKQ-da ótken baspasóz máslihatynda.
Onyń aitýynsha, qazirdiń ózinde densaýlyq saqtaý salasynda quny 59 mlrd teńgege 120 jobany iske asyrý kózdelgen.
«Bizde dári-dármekpen qamtýdyń memlekettik retteýi jolǵa qoiylǵan. Bizde biletinderińizdei, dári-dármek boiynsha jyl basynda mindetti túrde shý shyǵyp jatatyn. Biyl bul máseleni retke keltirdik. Búgingi tańda dári-dármek boiynsha quny 221 mlrd teńgege jyldyq qajettiliktiń 88 paiyzy qamtamasyz etildi. Onyń 95 paiyzy emdeý mekemelerine jetkizildi», - dedi ol.
