Ashyq NQA saitynda sailaý týraly QR Konstitýtsiialyq zańyna ózgerister engizý jobasy jariialandy, dep habarlaidy QazAqparat.
Zańnyń 12-babyna jańa tarmaqshalar engizý usynylady, osylaisha QR Ortalyq sailaý komissiiasyna qoǵamdyq birlestikter men kommertsiialyq emes uiymdardy akkreditteý tártibin ázirleý jáne bekitý ókilettikteri beriledi.
Sonymen birge, Ortalyq sailaý komissiiasy sailaýdy, referendýmdy daiyndaý men ótkizý kezeńinde sailaý komissiialaryn uiymdastyrý men olardyń qyzmeti úshin qajetti taýarlardy, jumystar men kórsetiletin qyzmetterdi satyp alý qaǵidalaryn ázirlep, bekitetin bolady.
Áleýmettik jelide qoǵam qairatkerleri bul túzetýler táýelsiz baqylaýshylardy, onyń ishinde sheteldik uiymdardan qarjylanatyn baqylaýshylardy úkimettik emes uiymdardan kýálik alýǵa májbúr etedi dep alańdap otyr.
Onyń kópshiligi tek qaǵaz júzinde ǵana bar jáne buryn-sońdy affilirlenbegen azamattar arasynan táýelsiz baqylaýshylardy jaldaý naýqanyn júrgizbegen.
Qazir kez kelgen qoǵamdyq uiym sailaýdy baqylai alatyn bolsa, endi jarǵyda tiisti tarmaǵy bar uiymdar ǵana baqylaýǵa jiberiledi.
«Tek tájiribesi bar jáne onymen kásibi túrde ainalysatyn uiymdardy ǵana baqylaýǵa alý tártibi burynnan bar. Al shetelden qarjylanatyn ÚEU akkreditatsiialaý máselesi pikirtalas týdyryp otyr. Táýelsiz baqylaýshylar – sailaý protsesiniń óte mańyzdy bóligi jáne sailaýdy baqylaý shynymen beitarap bolýy kerek jáne esh jaǵdaida sheteldik qarjylandyrýǵa da, úkimetke de, jeke tulǵaǵa da táýeldi bolmaýy kerek. Biz bul normalardy Májiliste zań jobasy boiynsha jumys kezinde talqylap, túsinikteme beremiz», - dedi QR Parlamenti Májilisiniń Zańnama jáne sot-quqyqtyq reforma komitetiniń hatshysy Snejanna Imasheva.
Saittaǵy qoǵamdyq talqylaý 28 shildege deiin jalǵasady. Osydan keiin ǵana zań jobasy QR Parlamenti Májilisine túsedi.
