Qazaqstanda Indýstriia jáne infraqurylymdy damytý ministrligi janynan ónerkásipti damytý qory qurylýy múmkin. Bul týraly Qazaqstan Respýblikasynyń mashina jasaýdy damytý jónindegi 2019-2024 jyldarǵa arnalǵan Jol kartasynda qamtylǵan, dep habarlaidy QazAqparat.
Aita keterligi, mundai qorlar Reseide, Belarýs elinde jáne Ekonomikalyq yntymaqtastyq jáne damý uiymyna múshe elderde tabysty jumys istep tur. Olar jyldyq 1-4% mólsherleme boiynsha zaemdar beredi, al lizing jobalaryna protsenttik mólsherleme 1% quraidy. Atap aitqanda, Reseidegi qor óz qarajatyn stanoktar, qalbyrlar shyǵarýǵa, quramdas ónimder óndirýge, ónerkásipti tsifrlandyrýǵa, eńbek ónimdiligin arttyrýǵa jumsaidy.
Qor qyzmetiniń tiimdiligi retinde ónerkásipti qoldaýdyń jalpylama saiasaty bir uiymǵa toptastyrylatyndyǵymen negizdeledi. Iaǵni, memlekettik qoldaýdyń tiimdiligine naqty monitoring pen analiz jasalady. Bul rette sarapshylar búgingi kúni óńdeýshi ónerkásipti damý institýttary men ekinshi deńgeili bankter arqyly qarjylandyrýdyń tiimsiz ekenin atap ótedi. Máselen, óńdeý ónerkásibiniń negizgi qarjy operatory «Báiterek» UBQ» AQ 2017 jylǵy jalpy somasy 2 trln teńgeni quraityn qarjylandyrýdyń tek 6,6% paiyzyn ǵana óńdeý salasyna baǵyttaǵan.
Toqtala ketetin jait, búgingi tańda otandyq mashina jasaý sektorynda myna salalar importqa táýeldi bolyp otyr:
- Elektrojabdyqtar – $ 2,7 mlrd;
- Avtomobil jasaý – $ 1,8 mlrd;
- Munaigaz salasyndaǵy mashina jasaý – $ 1,3 mlrd;
- Taý-ken salasyndaǵy mashina jasaý – $ 1,04 mlrd.
Bul rette qazaqstandyq kásiporyndar munai gaz salasy boiynsha importty almastyratyn ónimderdi jetkizý múmkindigi 56,7 mlrd. teńgeni quraidy. Sonymen qatar, otandyq kásiporyndar iri operatorlar úshin 100 mlrd teńgege deiingi kólemde jańa ónimder óndirisin jolǵa qoiýǵa daiyn ekendigin bildiredi.
Aita keterligi, Ónerkásipti damytý qoryn qarjylandyrý toqsan, jartyjyldyq jáne jyl qorytyndysy boiynsha igerilmegen qarajattardy qaita bólý esebinen júzege asatyny kózdeledi.
