Biyl indýstriialandyrý jobalarynda 17 myń turaqty jumys orny quryldy. Bul týraly QR Indýstriia jáne infraqurylymdyq damý ministri Beibit Atamqulov aityp berdi, dep habarlaidy QazAqparat.
«Jyl saiyn Indýstriialandyrý kartasy aiasynda jobalar iske qosylady. 2015-2019 jyldary ishinde 5,2 trln teńgege 556 joba engizildi, 85 myń turaqty jumys orny quryldy. Al 2020 jyly ákimdikterdiń derekteri boiynsha 17 myńnan astam turaqty jumys ornyn quryp, 1,1 trln teńgege 160 jobany iske qosý josparlanýda», - dedi spiker Ortalyq kommýnikatsiialar qyzmetinde ótken esep berý brifinginde.
Ministrdiń aitýynsha, indýstriialandyrý jyldary óńdeýshi ónerkásip salalaryn damytýda aitarlyqtai ózgerister boldy.
«Mysaly, jeńil ónerkásipte shaǵyn jáne orta biznesti yntalandyra otyryp, biz osy salany is júzinde qaita jandandyra aldyq. Qazirgi ýaqytta elimizde mata, kilem, balalar men eresekter kiimi, shulyq ónimderi, aiaq kiim, bas kiim jáne taǵy da basqa taýarlar óndiriledi. Bul rette olardyń sapasy importtyq ónimnen kem túspeidi, keide odan da asyp túsedi», - dedi B. Atamqulov.
Ministrdiń aitýynsha, Qazaqstanda óńdeý ónerkásibinde 1 myńnan astam kompaniia jumys isteidi, onda 17,9 myń adam eńbek etedi.
