Elimizde olimpiada oiyndaryna daiarlaityn ortalyqtar ashylmaq. Bul týraly Shýchinskide ótken Beijińdegi XXIV qysqy olimpiada oiyndarynyń qorytyndysyna arnalǵan keńeitilgen otyrysta belgili boldy, dep habarlaidy QazAqparat.
«Sporttyq rezervke qatysty kelesi jait, óńirlik, qalalyq jáne ulttyq deńgeidegi olimpiadalyq rezervti daiarlaý ortalyqtarynyń qyzmetimen bailanysty. Qazirgi ýaqytta respýblikalyq olimpiadaǵa daiarlaý ortalyqtaryn ashý máselesi pysyqtalyp jatyr. Ortalyqtardyń óz sporttyq bazalary bolady. Sondai-aq, jas sportshylardy daiarlaýdyń negizgi satylarynyń biri internat úlgisindegi sporttyq bilim berý mekemeleri. Bul bastamany da qolǵa alý josparda bar», - dedi QR Mádeniet jáne sport ministri Dáýren Abaev.
Ministrdiń málimetinshe, búginde 12 óńirde sportta daryndy balalarǵa arnalǵan 13 oblystyq mektep-internat jumys istep tur.
«Sportshylardy daiarlaý sapasyn arttyrý úshin olardy barlyq qajetti qural-jabdyqtarmen qamtamasyz etý kerek. Oblystyq biýdjet esebinen jáne memlekettik-jeke menshik áriptestik negizinde qosymsha sport bazalaryn salý qajet dep sanaimyn. Ásirese, ulttyq qurama komandalardy daiarlaýda sapaǵa basa nazar aýdarý qajet», - deidi ol.
