Elimizde jas mamandardyń jumysqa ornalasý deńgeii qandai jáne olardyń ýaqytyly jumysqa ornalaspaýynyń sebebi nede? Atalǵan suraqtarǵa «Atameken» ulttyq kásipkerler palatasy basqarma tóraǵasynyń orynbasary Oljas Ordabaev jaýap berdi, dep habarlaidy QazAqparat.
«Kolledj túlekterine kelsek, 2020 jyly bitirgen 145 myń mamannyń 65,1 paiyzy 1 jyldyń ishinde jumysqa ornalasty. Joǵary oqý ornyn bitirgenderdiń kórsetkishi joǵarylaý. Olardyń 77,7 paiyzy jyl kóleminde jumysqa ornalasady. Túlekterin ýaqytyly eńbekpen qamtamasyz etetin belsendi JOO-da bar. Iaǵni keibir ýniversitetterdi bitirgen mamandardyń 70 paiyzy oqýdy támamdaǵan soń bar-joǵy 3 aidyń ishinde jumysqa turady», - dedi Oljas Ordabaev «Habar-24» telearnasynyń «Interviý» baǵdarlamasynyń efirinde.
Onyń aitýynsha, «Atameken» UKP jumys berýshiler arasynda turaqty túrde saýalnama júrgizip turady.
«Saýalnama nátijesine sáikes, jumys izdeýshilerdiń 40 paiyzy qarapaiym daǵdylardy meńgermegen bolyp shyǵady. Ol degenimiz ujymmen jumys istei bilý, óz oiyn jetkizý, syn turǵysynan oilaý jáne komandamen jumys isteý. Jumys berýshilerdiń pikirinshe, maman kásibi bilikten bólek, zaman talabyna sai daǵdylardy meńgerýi mańyzdy. Basqasha aitqanda, saýalnamaǵa qatysýshylardyń pikirinshe, qazirgi jas mamandarǵa shiraqtyq jetispeidi», - deidi ol.
