Qazaqstannyń bas memlekettik sanitar dárigeri Aijan Esmaǵambetova aldaǵy ýaqytta Qazaqstan ókpeni jasandy jeldetýge arnalǵan 879 apparat satyp alýdy kózdep otyrǵanyn málim etti, dep habarlaidy "Ult aqparat".
«Qazirgi tańda elimizdegi densaýlyq saqtaý uiymdarynda 3 myń ókpeni jasandy jeldetý apparaty bar. Olar qajettilikke bailanysty infektsiialyq nemese jansaqtaý bólimderine taratylady. Búgingi kúni 167 apparat infektsiialyq aýrýhanalardyń jansaqtaý bólimderine berildi. Sonymen qatar meditsinalyq buiymdar parkin jańartý úshin jalpy respýblikada ókpeni jasandy jeldetýge arnalǵan 879 apparat satyp alý kózdelip otyr», - dedi Aijan Esmaǵambetova OKQ-da onlain rejimde ótken baspasóz máslihatynda.
Bas memlekettik sanitar dáriger suraqtarǵa jaýap bere otyryp búginde Qazaqstanda koronavirýs juqtyrǵan 652 meditsinalyq qyzmetker baryn málim etti.
«PTR-diagnostika - koronavirýs infektsiiasy úshin óte sezimtal. Testtiń nátijesi aǵzanyń boiyndaǵy virýstyń mólsherine bailanysty. Naýqas endi ǵana COVID-2019 aýrýyna shaldyqqan kezde álbette, onyń boiynda koronavirýstyń mólsheri óte az bolady. Iaǵni aǵzada virýs jetkilikti dárejede jinalmasa – biz PTR-test arqyly onyń virýsty juqtyrmaǵany týraly nátije alýymyz múmkin. Virýs kóbeigen kezde onyń mólsheri da arta túsedi. Osydan keiin PTR-test arqyly onyń boiynda shynynda da koronavirýstyń baryn anyqtai alamyz. Búkil álemde osylai. Bizde de kezdesedi. Áý basta virýsty juqtyrmaǵany týraly nátije ekinshi ret test alynǵanda ózgerýi múmkin», - dedi ol.
