10 jyldan astam jyljymaityn múlik agentiginde qyzmet etetin Ǵalym Ysqaqov sońǵy ailarda baspana saýdasy kúrt tómendep ketkenin aitady - páter quny tym qymbat. Muny Ulttyq statistika biýrosy da rastap otyr. Mysaly, naýryzda elde 67 myń jyljymaityn múlik satý mámilesi tirkelse, sáýirde 52 myńǵa deiin túsken.
"Iá sońǵy eki aida páter baǵasy qatty ósip ketti. Suranys azaidy. Sebebi: ipotekanyń mólsherlemesi kóterildi. 13,5 paiyzǵa. Ulttyq banktiń. Sondyqtan ipoteka 20 paiyzǵa deiin kóterilip ketti, ol óte qymbat. Buryn tutynýshy nesie bolǵan. Tipti odan da tómen", - deidi jyljymaityn múlik agenttiginiń bas direktory Ǵalym Ysqaqov.
Al zeinetaqy qoryndaǵy jetkilikti shekti somanyń mólsheri ósedi dep jariialanyp, ol sáýirge deiin shegerilgende basybaily baspanamdy alamyn deýshilerdiń sany lezde artypty. Bul qańtar-aqpan ailaryna tap kelgen. Telearna tilshisiniń sózinshe, suranystyń aiaqasty artýy da qurylys kompaniialaryna qol bolǵan.
Al keiin álemdegi geosaiasi ahýal kúrdelenip, dollardyń quny óskende qurylys kompaniialary da páter baǵasyn sharyqtatyp jibergen. Al endi kókqaǵazdyń baǵasy qalypqa tússe de, baspana qaita arzandar emes. Óitkeni qurylys materialdary qymbat kezinde alyp qoiǵan kompaniialardyń aýzy kúigen.
"Qurylys kompaniialar ártúrli áreket jasap jatyr. Bireýler úidiń baǵasyn túsirip jatyr, aktsiiamen. Ekinshiler bólip tóleýdi jasaidy. Kóp qurylys kompaniialary naryqtan ketip qalatyn siiaqty. Sebebi: kóp obektiler qazir toqtaǵan. Toqtatylyp jatyr", - deidi jyljymaityn múlik agenttiginiń bas direktory Ǵalym Ysqaqov.
Muny estigen kei "janashyrlar" qurylys kompaniialaryna memleket tarapynan sýbsidiia berilýi kerek dep te aityp jatyr. Biraq sarapshylar bul qisynsyz qalaý dep otyr. Úkimet bergen aqshaǵa dánikken qurylysshylar mastanyp ketýi múmkin eken. Ári "barmaq basty, kóz qystyǵa" salynary aitpasa da túsinikti jaǵdai.
"Qurylys kompaniialary sýbsidiialyq, bylai qarasańyz, jemge otyryp alsa, odan keiin jaǵdaiymyz múlde múshkil bolady. Birinshiden, eshqandai básekelestik bolmaidy. Ekinshiden, bizde qurylys kompaniialary arasyndaǵy aýyzjalasý, birlesip sýbsidiia alý, memeleketti barynsha sorý áreketi kóbeiedi. Odan halyqqa eshqandai paida bolmaidy", - deidi sarapshy Aibar Oljaev.
Telearna málimetinshe, jyljymaityn múlik saýdasymen ainalysatyn saitty qarasańyz, eldegi eń qymbat turǵyn úi Almaty shaharynda. Ońtústik astanada baspananyń sharshy metri 740 myń teńgege bir-aq jetken. Al ekinshi orynda - elorda. Almatyǵa qaraǵanda 100-150 myń teńge aiyrmashylyq bar.
Dál qazirgi jaǵdaida ekonomist sarapshylardyń pikiri ekige bólinip otyr. Biri - azamattar áliptiń artyn baǵyp, baspana baǵasynyń arzandaýyn kútý kerek dese, ekinshileri - basybaily baspana úshin qolda bar qarajatty qazir salyp úlgerý qajet deidi. Bul rette múlik saýdasymen ainalysatyndardyń da óz aitary bar. Azamattar úi satyp alǵanda muqiiat bolǵany abzal. Óitkeni qurylys kompaniialaryna qarjy jetispeýshiliginen sapasyz nysan kóbeiýi múmkin eken.
