Foto: ashyq derekkóz
Qazaqstanda esirtkige táýeldi adamdar sany 17 myńnan asty. Bul týraly Densaýlyq saqtaý ministri Aqmaral Álnazarova Úkimet otyrysynda málimdedi. Onyń aitýynsha, sońǵy bes jylda opioidtarǵa táýeldiler sany 1,5 ese azaiǵanymen, sintetikalyq stimýliatorlar men aralas esirtki qoldaný faktileri kúrt artqan, dep habarlaidy Ult.kz.
2024 jyldyń sońynan bastap elimizde táýeldilik sindromy joq, biraq esirtkini ózine ziiandy túrde tutynatyn azamattar úshin konsýltatsiialyq baqylaý engizildi. Qazir mundai sanattaǵy 3 myńǵa jýyq adam esepke alynǵan.
Narkologiialyq kómek 20 óńirlik psihikalyq densaýlyq ortalyǵynda, 79 qalalyq jáne 205 aýdandyq kabinette kórsetiledi. Sonymen qatar, 94 jastar densaýlyq ortalyǵy 2024 jyly 700 myńnan astam adamǵa qyzmet kórsetken.
2025 jyldan bastap emdeýdiń tiimdiligin arttyrý úshin jańa ádistemelik usynymdar bekitilip, aýrýhanaǵa jatqyzýǵa qarsy kórsetilimder tizbesi qaita qaralýda.
Premer-ministr Oljas Bektenov nashaqorlyqtyń, ásirese jastar arasynda keńinen taralýy qoǵam úshin úlken qaýip ekenin atap ótti.
«Qazir esirtki taratýdyń jańa tásilderi – internet, poshta, kriptokoshelek arqyly “jasyryp ketý” ádisteri keń etek jaiǵan. Bul tikelei fizikalyq bailanysty boldyrmai, taratýshylardy ustaýdy qiyndatyp otyr», – dedi Úkimet basshysy.
Premer-ministr Ishki ister jáne Tsifrlyq damý ministrlikterine:
-
esirtkige qatysty saittar men jarnamalardy anyqtaý jáne buǵattaý tetikterin kúsheitýdi,
-
esirtki ainalymyna bailanysty kúmándi aqsha aýdarymdaryn toqtatýdy,
-
nashaqorlyq týdyratyn dárilik zattardyń dárihanalardaǵy qozǵalysyna baqylaýdy arttyrýdy tapsyrdy.
Sonymen qatar, kámeletke tolmaǵandar arasynda nashaqorlyqtyń aldyn alý, anyqtaý jáne emdeý sharalary da ózekti bolyp otyr.
