Qazaqstanda áleýmettik nan baǵasy kóterilmeidi. Bul týraly aýyl sharýashylyǵy ministrliginiń ókilderi málimdedi, dep habarlaidy Sputnik Qazaqstan.
Buǵan deiin Qazaqstanda diirmenshiler astyq tapshylyǵyna bailanysty jumysyn toqtatýǵa májbúr ekeni týraly aqparat taraǵan bolatyn.
Osyǵan bailanysty jýrnalister ortalyq kommýnikatsiialar qyzmetinde ótken baspasóz máslihatynda aýyl sharýashylyǵy ministrliginiń ókilderinen "Nan qymbattai ma?" dep surady.
"Bizde eki túrli nan bar. Birinshisi áleýmettik nan. Onyń baǵasyn memleket retteidi jáne baqylaidy. Búginde áleýmettik nannyń baǵasy óńirlerde turaqty, ózgermeidi. Eger jekelegen óńirlerde diirmenshiler shikizat tapshylyǵyna tap bolsa, nemese bidai baǵasy kúrt ósse, onda bidai qunyn sýbsidiialaý baǵdarlamasy iske qosylady. Iaǵni qazirgi tańda áleýmettik nan baǵasynyń kóterilýine eshqandai alǵyshart joq", - dep jaýap berdi AShM Eginshilik departamentiniń direktory Azat Sultanov.
Al premialdy nannyń, iaǵni baget, krýassan jáne taǵy basqalarynyń baǵasy shikizat qunyna qarai ózgerip turady.
AShM Agrarlyq azyq-túlik naryǵy jáne aýyl sharýashylyǵy ónimin qaita óńdeý departamentiniń direktory Nazgúl Hatepovanyń aitýynsha, ishki naryqta bidai nemese un tapshylyǵy joq. Biraq álemdik naryqta Resei tarapynan salynǵan shekteýge bailanysty bidai men unǵa degen suranys artyp otyr.
Osyǵan bailanysty álemdik naryqta bidai baǵasy birneshe esege ósken.
"Soǵan qaramastan biz ishki naryqty turaqtandyrý maqsatynda kez kelgen óńirdiń óziniń fiziologiialyq tutyný normalaryna sáikes, sol halyqty qajetti kólemde qamtamasyz etý úshin turaqtandyrý qorlarynan kepildi túrde qajetti kólemdegi undy satyp alamyz. Qazirgi kezde jalpy Qazaqstan boiynsha 120 myń tonnaǵa jýyq un bar. Sonyń 30 myńǵa jýyǵy – turaqtandyrý qorlarynda", - dedi ol.
Ol turaqtandyrý qorlarynyń negizgi mindeti baǵany turaqtandyrý ekenin atap ótti.
"Iaǵni naryqta, meili ol ishki naryq bolsyn, álemdik naryq bolsyn, bidai men un baǵasy ósse, atalǵan turaqtandyrý qorlarynda saqtaýly turǵan un ishki naryqqa arzan baǵamen satylady", - dep túsindirdi departament direktory.
Budan bólek, Azyq-túlik kelisimshart korporatsiiasynyń rezervinde 800 myń tonnaǵa jýyq astyq saqtalǵan. Onyń 500 myń tonnasy – rezervtik qor.
"Sondyqtan álemdik naryqta bidai nemese un baǵasynyń ósýi ishki naryqta tikelei unnyń nemese nannyń qymbattaýyna áserin tigizedi deý – bul qate pikir", - dedi Hatepova.
