Foto: ashyq derekkóz
Premer-ministr Oljas Bektenovtiń tóraǵalyǵymen ótken Úkimet otyrysynda himiia jáne munai-himiia salasyn damytý máselesi qaraldy, dep habarlaidy Ult.kz.
Oljas Bektenov munai-gaz himiiasy salasy týraly jeke zań ázirleýdi tapsyrdy.
«Munai-gaz biznesi ókilderimen ótken keńeste munai-gaz himiiasy salasy týraly jeke zań ázirleý máselesi kóterildi. Bul bastamany qoldaimyn.
Energetika, Ónerkásip jáne qurylys, Ulttyq ekonomika, Ádilet ministrlikterine osy jyldyń 1 qyrkúiegine deiin Úkimet Apparatyna tiisti zań jobasyn engizýdi tapsyramyn», — dep atap ótti Premer-ministr Oljas Bektenov.
Sondai-aq munai-gaz himiiasy ónerkásibin damytýdyń 2024-2030 jyldarǵa arnalǵan Jol kartasyna sáikes, jalpy quny shamamen $15 mlrd bolatyn alty iri investitsiialyq jobany iske asyrý josparlanýda. Bul týraly Úkimet otyrysynda energetika ministri Erlan Aqkenjenov málimdedi.
Jobalardy iske asyrý shamamen 3,5 myń turaqty jumys ornyn jáne qurylys kezeńinde 16 myńnan astam ýaqytsha jumys ornyn ashýǵa múmkindik beredi. Atalǵan sharalar salany keshendi yntalandyrýǵa jáne óńir ekonomikasyn damytýǵa baǵyttalǵan.
