Qazaqstanda tiisti zańǵa munai-gaz-himiia jobalaryn tabiǵi gazben qamtamasyz etýge múmkindik beretin túzetýler engizildi. Bul jóninde Energetika ministrliginiń baspasóz qyzmeti habarlady.
Búgingi tańda Qazaqstanda shikizat retinde gazdy paidalana otyryp, munai-gaz-himiia ónimderin óndirý boiynsha birqatar jobalardy iske asyrý josparlanyp otyr. Alaida budan buryn osy jobalardy gazben qamtamasyz etý tetigi ornatylmaǵan.
«Ministrlik munai-gaz salasynyń shikizattyq baǵyttarynan qosylǵan quny joǵary ónim shyǵaratyn munai-gaz-himiia óndiristerin qurý úshin turaqty negizde júieli jumys júrgizip otyr. Tabiǵi gaz - gaz himiiasy úshin qundy shikizat. Gazdyń barlyq baǵaly komponentterin alý dárejesin arttyrý jáne tiimdi paidalaný jańa himiialyq materialdardyń tutas klasterine jańa serpin beredi. Gaz-himiia ónimi - óte baǵaly eksporttyq ónim. Ony satý gazdy satýǵa qaraǵanda áldeqaida tiimdi. Gazdy óńdeýdiń tórt-bes satysynan keiin (mysaly, gaz→etan→etilen→polietilen→polietilen buiymdary) sońǵy ónimniń quny shamamen 5-6 ese ósedi. Alaida, osynda n egizgi máselelerdiń biri - shikizatpen qamtamasyz etý bolyp otyr» delingen minitsrlik taratqan habarlamada.
Atalǵan máseleni sheshý maqsatynda «Gaz jáne gazben jabdyqtaý týraly» zańǵa túzetýler engizilgen.
Zańdy iske asyrý sheńberinde Energetika ministriniń 29 sáýirdegi buiryǵymen Munai-gaz-himiia ónimderin óndirý jónindegi investitsiialyq jobalardyń tizbesin jasaý qaǵidalary bekitilgen.
Onda investitsiialyq jobalardyń tiimdiligin baǵalaý tetigi kózdelgen.
«Tetikke sáikes jobalar makroekonomikalyq, áleýmettik, ekologiialyq jáne tehnikalyq kórsetkishter bazasynda olardyń artyqshylyqtaryn sipattaityn ólshemder negizinde baldyq júie boiynsha baǵalanady. Qosylǵan quny joǵary bazalyq gaz-himiia ónimderin óndirý munai-gaz salasyndaǵy tereń óńdeýdi damytý úshin berik negiz bola otyryp, bizdiń tehnologiialyq damý strategiiamyzǵa sáikes keledi» dep málim etti vedomstvodan.
