Foto: Gov.kz
Qazaqstanda zańdy jáne jeke tulǵalar úshin memlekettik rámizderdi qoldaný tártibi egjei-tegjeili reglamenttelmek, dep habarlaidy Ult.kz.
Bul týraly Premer-ministrdiń orynbasary – mádeniet jáne aqparat ministri Aida Balaeva Úkimet otyrysynda málimdedi.
Vitse-premer Memleket basshysynyń Ulttyq quryltaidyń V otyrysynda bergen tapsyrmalaryn oryndaý aiasynda atqarylyp jatqan jumystarǵa toqtaldy. Onyń aitýynsha, Prezident aiqyndap bergen «Zań jáne tártip», «Adal azamat», «Taza Qazaqstan» qaǵidattary boiynsha júieli jumys jalǵasady.
Sondai-aq memlekettik rámizderdi, rýhani-adamgershilik jáne otbasy qundylyqtaryn nasihattaýǵa baǵyttalǵan aqparattyq-túsindirý sharalary kúsheitiledi. Osy maqsatta Mádeniet jáne aqparat ministrligi zańdy jáne jeke tulǵalar úshin memlekettik rámizderdi paidalaný tártibin naqtylaityn normativtik ózgerister ázirleidi. Sonymen qatar kórneki nusqaýlyqtar daiyndalady.
Memleket basshysynyń tapsyrmasyna sáikes, memlekettik rámizderge airyqsha qurmet kórsetetin azamattardy qosymsha yntalandyrý tetikteri de qarastyrylmaq.
Úkimet otyrysynda tarihi-mádeni muralardy halyqaralyq deńgeide nasihattaý máselesi de kóterildi. Prezidenttiń tapsyrmasymen Jarkent meshiti men Voznesensk soboryn biriktiretin nominatsiiany, sondai-aq Qarataý jotasyndaǵy petroglifterdi IýNESKO-nyń Búkilálemdik muralar tizimine engizý boiynsha jumystar júrgiziledi. Sonymen birge «Abaidyń qara sózderin» IýNESKO-nyń «Álem jady» tizimine engizýge arnalǵan qujattar saraptamalyq baǵalaýǵa joldanǵan.
