Qazaqstanda Memlekettik basqarýdy damytýdyń 2030 jylǵa deiingi tujyrymdamasy ázirlendi. Bul týraly Strategiialyq josparlaý jáne reformalar agenttiginiń tóraǵasy Qairat Kelimbetov aityp berdi, dep habarlaidy QazAqparat.
«Memlekettik basqarý – memlekettik josparlaý júiesine jańa tásilderdi tabysty engizýdiń negizgi bóligi. Osy baǵyttaǵy transformatsiianyń negizgi qaǵidaty «Adamǵa baǵyttalý» bolady. Jappai tsifrlandyrý, onyń ishinde Data Driven Government platformasyn engizý memlekettik basqarý júiesin jaqsartýdyń negizgi elementine ainalady jáne tiisinshe memlekettik josparlaý júiesiniń tabysty qyzmetin qamtamasyz etýge múmkindik beredi», - dep atap ótti Qairat Kelimbetov Úkimettiń búgingi otyrysynda.
Spiker 29 qańtarda Prezidenttiń Qazaqstan Respýblikasynda memlekettik basqarýdy damytýdyń 2030 jylǵa deiingi tujyrymdamasyn maquldaǵanyn, ony 2021 jylǵy 10 aqpanǵa deiin qol qoiýǵa engizý josparlanǵanyn atap ótti. Tujyrymdamaǵa sáikes, memlekettik saiasatty qalyptastyrý jáne iske asyrý kezinde memlekettik apparat pen memlekettik qyzmetshiler memlekettik basqarýdyń 5 irgeli qaǵidatyn basshylyqqa alatyn bolady.
«Bizdiń memleketimiz halyq únine qulaq asatyn, qoǵamǵa esep beretin, kásibi jáne pragmatikalyq bolýy tiis. Memlekettik basqarýdyń servistik modeline kóshý úshin memlekettik apparattyń aldyna 9 negizgi mindet qoiyldy. Sonymen birge, memlekettik basqarý tujyrymdamasyn iske asyrý aýqymdy jumysty talap etedi. Osyǵan bailanysty, Asqar Uzaqbaiuly (Úkimet basshysy Asqar Mamin – avt.), Ulttyq ekonomika ministrligine múddeli memlekettik organdarmen birlesip, osy Tujyrymdamany iske asyrý josparyn 1 naýryzǵa deiin ázirleýdi tapsyrǵan jón dep sanaimyz», - dedi Q.Kelimbetov.
