QR Premer-Ministri Asqar Mamin Prezident Qasym-Jomart Toqaevqa memlekettik qyzmetshilerge eńbekaqy tóleý júiesiniń pilottyq rejiminiń júzege asyrylýy jóninde baiandady, dep habarlaidy "Ult aqparat" Aqordanyń resmi saityna silteme jasap.
Atalǵan pilottyq jobaǵa 2018 jyly Memlekettik qyzmet isteri agenttigi, Sybailas jemqorlyqqa qarsy is-qimyl agenttigi, Ádilet ministrligi, birqatar óńirdiń ákimdikteri qatysty.
«Júrgizilgen tájiribeniń nátijesinde jobaǵa qatysýshy memlekettik organdarda kadrlardyń almasýy 4,9 paiyzdan 3,5 paiyzǵa deiin azaiyp, memlekettik qyzmettiń tartymdylyǵy arta tústi (konkýrs 1 orynǵa 3,4 esege artty), ortalyqta jáne aimaqtarda eńbekaqy tóleý alshaqtyǵy 70 paiyzdan 16 paiyzǵa deiin qysqardy»,-dedi Asqar Mamin Memleket basshysymen kezdesý barysynda.
QR Prezidenti atalǵan jobany jergilikti atqarýshy organdarda sondai-aq, ortalyq memlekettik organdarda aýqymdy túrde júzege asyrýdy tapsyrdy.
Sonymen qatar Memleket basshysy memlekettik qyzmetshilerdiń sanyn kezeń-kezeńimen qysqartý jáne memlekettik apparattyń uiymdyq qurylymyn ońtailandyrý jumystaryn jalǵastyrý kerektigin aitty.
Prezident qurylymdy qaita ózgertý nátijesinde únemdelgen qarjyny eńbekaqy kólemin arttyrýǵa baǵyttaý mańyzdy dep sanaidy.
Budan bólek kezdesýde syrtqy jáne ishki investitsiialardy tartýdy ulǵaitý, shaǵyn jáne orta biznestiń áleýetin arttyrý, qaita óńdeý sektorynyń ósimi men damýy esebinen ekonomikanyń qurylymyn odan ári ártaraptandyrý, elimizdiń áleýmettik-ekonomikalyq damýyna qatysty basqa da ózekti máseleler jóninde qabyldanǵan sharalar qarastyryldy.
