Qazaqstanda memlekettik qyzmetke ornalasýdyń jańa tásilderi engiziledi. Bul týraly QR Memlekettik qyzmet isteri agenttiginiń tóraǵasy Anar Jaiylǵanova aityp berdi, dep habarlaidy QazAqparat.
«2020 jyly alǵash ret «A» korpýsynyń memlekettik qyzmetshilerine arnalǵan arnaiy qaita daiarlaý kýrstary engizildi. Baǵdarlamanyń maqsaty – jańa syn-qater jaǵdaiynda tiimdi basqarý boiynsha praktikalyq daǵdylardy qalyptastyrý boldy. Atalǵan baǵdarlamalar boiynsha 49 memlekettik qyzmetshi, jáne Prezidenttik jastar kadrlyq rezerviniń músheleri oqytyldy», - dedi A. Jaiylǵanova QR Memlekettik qyzmet isteri agenttiginiń alqa otyrysynda.
Kásibi daiyndyqtyń tiisti sapasyn qamtamasyz etý úshin agenttik janyndaǵy úilestirý keńesi memlekettik qyzmetshilerdiń biliktiligin arttyrý boiynsha bilim beretin uiymdar tizimin anyqtaidy.
Sonymen birge, 2020 jyly memlekettik qyzmetshilerdi qaita daiarlaý jáne olardyń biliktiligin arttyrý qunyn esepteýdiń biryńǵai ádistemesi bekitildi.
«Agenttik aldynda turǵan mańyzdy mindetterdiń biri – memlekettik qyzmetti básekege qabiletti mamandarmen qamtamasyz etý. Ótken jyldyń jeltoqsanynda Prezident memlekettik qyzmetke turý rásimderin jetildirý tásilderimen tanysty jáne qoldaý kórsetti. Atalǵan tásilderdi pilottyq rejimde 2021 jyldyń 1 shildesine deiin eńbekaqy tóleýdiń jańa júiesi engizilgenshe synaqtan ótkizý josparlanǵan», - deidi Anar Jaiylǵanova.
Spikerdiń aitýynsha, bul tásilder memlekettik qyzmetke irikteý júiesi men faktorlyq-baldyq shkalany sinhrondaýdy kózdep otyr. Munda irikteý quraldarynyń mazmuny qaita qaralǵan jáne protsestiń úsh kezeńi saqtaldy: testileý, quzyretterdi baǵalaý jáne suhbattasý.
