Foto: Pexels.com
Elimizde Memleket basshysynyń bastamasymen «Bilim berýdegi ózgeristerdiń 1000 kóshbasshysy» jobasy júzege asyrylýda. Bul joba mektepterge jańa formattaǵy kásibi jáne basqarýshylyq biliktiligi joǵary basshylardy daiarlaýǵa baǵyttalǵan. Biyl baǵdarlamaǵa qatysýǵa niet bildirýshiler sany ótken jylmen salystyrǵanda 2,5 esege artty, dep habarlaidy Ult.kz QR Oqý-aǵartý ministrliginiń baspasóz qyzmetine silteme jasap.
Irikteý kezeńderi:
Baǵdarlamaǵa irikteý bes kezeńnen turady:
1. Testileý: Úmitkerler kásibi jáne basqarýshylyq quzyretterin baǵalaýdan ótedi.
2. Oqý: Ekinshi kezeńde úmitkerler arnaiy kýrstarda oqidy.
3. Taǵylymdama: Eldiń jetekshi mektepterinde tájiribeden ótedi.
4. Qorytyndy baǵalaý: Bilimderi men daǵdylary tekseriledi.
5. Áńgimelesý: Ministrlik komissiiasymen suhbattasý júrgiziledi.
Barlyq kezeńderden ótken kandidattar bilim berý uiymdarynyń Respýblikalyq kadrlyq rezervine alynady.
Biylǵy jyly alǵashqy kezeńde 13 796 úmitker tirkelgen. Barlyq bes kezeńdi aiaqtaǵan soń 375 kandidat balabaqsha, mektep jáne kolledj basshysy laýazymyna usynyldy.
«Úmitkerler oqýdan, taǵylymdamadan jáne áńgimelesýden ótken soń sertifikat alady. Osy sertifikat negizinde olar kadr rezervine engiziledi. Rezervke engender birinshi basshynyń bos laýazymyna konkýrstyq rásimdersiz taǵaiyndalady. Barlyq kezeńderden sátti ótkenderge «basshy-kóshbasshy» biliktilik sanaty beriledi», — dep málimdedi Orta bilim komitetiniń tóraǵasy Qanybek Jumashev.
Ótken jyly kadrlyq rezervke 208 kandidat alynǵan bolsa, olardyń 170-i mektep direktory laýazymyna taǵaiyndaldy.
