Qazaqstanda sáýirde dini ǵimarattardyń qurylysyn reglamentteitin jańa normalar qabyldandy, dep habarlady tvk-uko.kz.
Shymkent qalasy men Túrkistan oblysynda sany 800-den asqan ǵibadathanyń jai-kúii din qyzmetkerleri, din isteri jáne qurylys basqarmalarynyń mamandary qatysqan keńeste talqylandy. Olardyń qanshasy zańdy, qanshasy zańsyz salynǵanyn sheneýnikter ázirge anyqtai alǵan joq.
Oblysta sońǵy úsh jylda segiz meshit salýǵa ruqsat berilgen, qalǵany zańsyz salynǵan, deidi sáýlet jáne qala qurylysy basqarmasynyń qyzmetkerleri.
Qazaqstanda biylǵy jyldyń sáýirinde dini ǵimarattardyń qurylysyn reglamentteitin jańa normalar qabyldandy. Endi mektepten 300 metr aýmaqta ornalasqan barlyq meshit súriledi.
"Eger adam zańsyz ǵibadathana salsa, ol ony ózi súrýi tiis. Keiin ol jerge, qurylys salýǵa qajetti ruqsattardy alyp, tiisti organǵa habarlaýǵa mindetti. Sodan keiin qurylysty bastaýǵa ruqsat etiledi", — deidi Túrkistan oblysy sáýlet jáne qurylys basqarmasynyń basshysy Baqytbai Dúisebekov.
Meshit salý bastamasyn kóteretin adamdardyń birazy ruqsat almaityndyqtan, óńirde zańsyz turǵyzylǵan meshitterdiń sany jyl sanap artyp jatyr. Saldarynan aýyldar men okrýgterdegi keibir dini ǵimarattar kóbinese bos qalady, deidi sheneýnikter.
"Oblysta jáne Shymkentte 800-den astam meshit bar, kóbisi bos qalyp jatady. Oǵan adam sanynyń jetpeýi nemese qurlys normasynyń saqtalmaýy sebep bolady. Ol meshitterge eshkim barmaǵandyqtan, biz ony ǵibadat bólmesine ainaldyramyz", — deidi Túrkistan oblysy din ister basqarmasynyń basshysy Samat Saparbaev.
Kezdesý sońynda sheneýnikter metsenattardan qandai da bir dini nysandy salar kezde zań normalaryn saqtaýdy ótindi.
