Qazaq kinosynyń jaryq juldyzy, "Qyz Jibek" filmi arqyly kópshilikke tanylǵan aktrisa Merýert Ótekeshovaǵa 75 jasqa tolýyna orai erekshe tort syiǵa tartyldy. Konditerler óner iesiniń ómiri men shyǵarmashylyǵyn beineleitin tórt qabatty tátti týyndy ázirlegen, dep habarlaidy ult.kz.
Mereitoiǵa arnalǵan torttyń syrtqy kórinisi teatr sahnasyna uqsatyp jasalǵan. Onyń ár qabatyna aktrisanyń shyǵarmashylyq jolynan syr shertetin, sondai-aq otbasylyq ómirinen estelik bolatyn fotosýretter ornalastyrylǵan. Al torttyń eń joǵarǵy bóligi Merýert Ótekeshovanyń "Qyz Jibek" filmindegi beinesin eske túsiretin sáýkelemen bezendirilgen.
Konditerlik úi ókilderiniń aitýynsha, mundai erekshe syilyqty daiyndaýǵa 13 kún ketken. Sheberler torttyń ár bólshegine mán berip, aktrisanyń ónerdegi jolyn bir týyndyǵa syiǵyzýǵa tyrysqan.
Merýert Ótekeshova tosynsyidy kórgende tańdanysyn jasyra almaǵan. Ol konditerlerdiń eńbegin joǵary baǵalap, tortty mýzeige qoiýǵa laiyq ekenin aitqan.
"Mýzeige berý kerek bul tortty", – degen aktrisanyń sózin konditerlik úi áleýmettik jelidegi paraqshasynda jariialady.
Tátti týyndynyń jasalý barysy da jelide kórsetildi. Konditerler ideianyń qalai paida bolǵanyn, ár qabattyń bezendirilýin jáne daiyn torttyń sońǵy kórinisin kópshilik nazaryna usynǵan.
"Qazaqtyń Qyz Jibegine qýanysh syilaýdy qaladyq. Al bul videoda sol qýanyshtyń artyndaǵy jumys. Qazaqtyń Qyz Jibegi – Merýert Ótekeshovaǵa arnalǵan tortymyz osylai daiyndaldy. Ideiadan bastap sońǵy bezendirýge deiin konditerlerimiz bar sheberligi men yqylasyn saldy. Ár bólshekti daiyndap, bezendirip, bárin bir týyndyǵa biriktirý komandamyz úshin erekshe jumys boldy", – delingen konditerlik úidiń jazbasynda.
Osylaisha, sheberler aktrisanyń mereitoiyna jai ǵana tort emes, onyń ónerdegi jetistikteri men ómir jolyn beineleitin erekshe syilyq tartý etti.
Merýert Ótekeshova kim?
Merýert Ótekeshova – qazaq kinosy men teatr óneriniń damýyna eleýli úles qosqan tanymal aktrisa, Qazaqstannyń eńbek sińirgen ártisi. Ol 1951 jyly 25 aqpanda Oral qalasynda dúniege kelgen. Aktrisa qazaq kórermenine eń aldymen rejisser Sultan Qojyqovtyń "Qyz Jibek" filmindegi basty róli arqyly tanyldy. 1970 jyly jaryq kórgen bul tarihi týyndy qazaq kinosynyń klassikalyq shyǵarmalarynyń birine ainaldy. Merýert Ótekeshova Qyz Jibek beinesin somdaǵan kezde nebári 19 jasta bolǵan. Onyń ekrandaǵy tabiǵi oiyny men ulttyq bolmysty sheber jetkizýi kórermenderdiń erekshe yqylasyna bólendi.
1969-1973 jyldary Qurmanǵazy atyndaǵy Qazaq memlekettik óner institýtynda bilim alyp, belgili aktrisa Hadisha Bókeevanyń sheberhanasynda akterlik sheberligin shyńdady. Oqýyn aiaqtaǵannan keiin Muhtar Áýezov atyndaǵy Qazaq memlekettik akademiialyq drama teatrynyń quramyna qabyldandy. Teatr sahnasyndaǵy alǵashqy róli Shyńǵys Aitmatovtyń "Ana – Jer-Ana" qoiylymyndaǵy Áliman beinesi boldy. Keiin "Qaragóz", "Eńlik – Kebek", "Ápke" siiaqty spektaklderde mańyzdy rólderdi somdady. Aktrisa "Shoqan Ýálihanov", "Mahambet", "Aq baqsy" jáne basqa da filmderge tústi. 1982 jyly oǵan Qazaq KSR-iniń eńbek sińirgen ártisi ataǵy berildi. Ónerdegi eńbegi úshin 2008 jyly "Qurmet", 2017 jyly "Parasat" ordenderimen marapattaldy. 2025 jyly Merýert Ótekeshovaǵa Qazaqstannyń halyq ártisi ataǵy berildi. 2026 jyly 75 jasqa tolǵan aktrisa qazaq kinosy men teatryndaǵy kórnekti tulǵalardyń biri sanalady.
