Qazaqstanda shahmatty ulttyq mektep júiesine engizý boiynsha jumys kúsheitiledi. Tiisti kelisim QR Oqý-aǵartý ministrligi men Qazaqstan shahmat federatsiiasy arasynda jasaldy. Bul týraly grossmeister, Qazaqstan shahmat federatsiiasynyń birinshi vitse-prezidenti Dármen Sadvakasov habarlady.
D. Sadvakasovtyń aitýynsha, búginde balalarǵa oiyndar, qysqa videolar men túrli áleýmettik jelilerdiń kóptigine bailanysty telefonnan ajyraý barǵan saiyn qiyndap barady. Sonyń saldarynan olardyń zeiini tómendep, jańa aqparatty meńgerýde jáne bastaǵan isin aiaqtaýda qiyndyqtar týyndaidy.
«Sondyqtan búgingi mekteptiń mindeti tek bilim berýmen shektelmeidi, balalardy oilaýǵa, taldaýǵa jáne zeiinin shoǵyrlandyrýǵa úiretý de mańyzdy. Bul turǵyda shahmat - óte tiimdi qural. Bul jai ǵana oiyn emes. Shahmat logikany, este saqtaý qabiletin damytady, sheshim qabyldaýǵa jáne óz áreketteriniń saldaryn túsinýge úiretedi», - dep jazdy D. Sadvakasov Facebook paraqshasynda.
Ol 2023 jyly Memleket basshysynyń tapsyrmasy boiynsha Qazaqstan Respýblikasynda shahmatty damytýdyń 2027 jylǵa deiingi keshendi jospary ázirlenip, bekitilgenin eske saldy. Negizgi baǵyttardyń biri - shahmatty mektepterge engizý.
«Jospar boiynsha 2027 jylǵa qarai baǵdarlama 1 400 mektepti qamtýy tiis edi. Alaida qazirdiń ózinde bul kórsetkishten asyp tústik. Muǵalimder men ata-analardyń suranysynyń artýyna bailanysty baǵdarlamaǵa 1 500-den astam mektep qatysyp otyr. Olardyń basym bóligi - aýyl mektepteri», - dedi D. Sadvakasov.
Onyń aitýynsha, osy oń úrdisti eskere otyryp, baǵdarlama aiasyndaǵy jumysty odan ári damytý máselesi boiynsha QR Oqý-aǵartý ministri J. Súleimenovamen arnaiy kelissózder júrgizilgen. Negizgi maqsat - Qazaqstandaǵy árbir balaǵa sapaly shahmat bilimin alýǵa qoljetimdilik qamtamasyz etý.
«Bul baǵytty kúsheitýge qajetti tolyq qoldaýǵa ie boldyq. Qazaqstan shahmat federatsiiasymen birlesip, ministrlik janynan tiisti jumys toby qurylyp, jan-jaqty qoldaý kórsetiledi», - dep atap ótti QShF birinshi vitse-prezidenti.
Sondai-aq ol baǵdarlamany kúsheitý úshin qajetti pedagogikalyq baza daiyndalyp jatqanyn aitty. Búginde biliktilikti arttyrý kýrstarynan 3 500-den astam pedagog ótti, jáne jyl saiyn bul baǵytqa qyzyǵýshylyq artyp keledi.
Sonymen qatar, respýblikadaǵy 5 pedagogikalyq joǵary oqý ornynda shahmat boiynsha diplomdy muǵalimderdi daiarlaý baǵdarlamasy iske qosyldy. Qazir onyń aiasynda 200-den astam stýdent bilim alýda, al 2028 jylǵa qarai, D. Sadvakasovtyń aitýynsha, Qazaqstanda keminde 1000 diplomdy maman daiyndalady dep kútilýde.
«Jalpy, shahmat - tek oiyn ǵana emes. Bul oilaý, zeiindi shoǵyrlandyrý jáne sheshim qabyldaý qabileti. Al dál osy daǵdylar búgingi kúni asa mańyzdy. Shahmat bilim berý salasynda shynymen de qajet quralǵa ainalyp keledi. Bul - ziiatker ult qalyptastyrýǵa qosqan úlesimiz», - dep túiindedi ol.
