Qazaqstanda mekenjai anyqtamasy joiyldy. Bul jaiynda QR Ishki ister ministrliginen málim etti, dep habarlaidy "Ult aqparat".
«Azamattardy tirkeý týraly málimetterdi berý eń suranysqa ie memlekettik qyzmetterdiń biri bolyp sanalady. Jyl saiyn halyq qujattardy, jeńildikterdi, járdemaqylardy jáne basqa da qyzmetterdi alý úshin memlekettik organdar men uiymdarǵa 10 millionnan astam mekenjai anyqtamasyn suratady. Azamattar jumysqa, mektepterge, balabaqshalarǵa, emhanalarǵa, bankterge jáne taǵy basqa jerlerge ornalasý kezinde únemi HQKO-na, memlekettik organdarǵa júginýge májbúr bolady, kezekte kóp ýaqytyn joǵaltady», - dep atap ótedi ministrlikten.
Osy olqylyqtyń ornyn toltyrý maqsatynda Ishki ister ministrligi óz derekter bazasyn basqa memlekettik organdarmen biriktirgen. Bul halyqqa memlekettik qyzmet kórsetý tetigin jeńildetti. Atap aitqanda, mekenjai anyqtamalaryn berý tolyǵymen alynyp tastaldy. Sebebi bul derekter barlyq memlekettik organdardyń bazasynda bar.
«Memlekettik qyzmetterdi alý ýaqytyn qysqartý jáne qaǵazbastylyqty azaitý maqsatynda mekenjai anyqtamasy endi suralmaidy. Qazir normativtik-quqyqtyq aktilerge tiisti túzetýler engizilýde.
Bul rette azamattardyń ózderi tirkeý mekenjaiy týraly málimetterdi «Elektrondyq úkimet»portalyndaǵy jeke kabinetinde teksere alady. Turǵyn úi ieleri sondai-aq portal nemese «Elektrondyq úkimettiń» mobildik qosymshasy arqyly óz úiinde tirkelgen adamdar týraly málimetterdi teksere alady», - dep atap ótedi vedomstvodan.
Mekenjai anyqtamalaryn berýdiń kúshin joiý artyq qaǵaz qujat ainalymyn qysqartady jáne azamattarǵa anyqtama alý úshin HQKO-ǵa júginýdiń qajeti bolmaidy.
Budan basqa, IIM azamattardy tirkeýge bailanysty basqa da birqatar memlekettik qyzmetterdi jeńildetip, ońtailandyrdy. Jyl sońyna deiin «Tsifrlyq Qazaqstan» baǵdarlamasy aiasynda IIM halyqqa taǵy 8 qyzmet kórsetýdi elektrondyq formatqa kóshirýdi josparlap otyr. Osylaisha, IIM-niń halyqqa kórsetetin memlekettik qyzmetterdiń shamamen 90 paiyzy avtomattandyrylatyn bolady.
