«Azamattarǵa arnalǵan úkimet» memlekettik korporatsiia basqarmasynyń tóraǵasy Ásemgúl Baltasheva elimizde mekenjai anyqtamasy naqty qashan joiylatynyn málim etti, dep habarlaidy QazAqparat.
Elordada «Tsifrlyq kúz» sharasynda Ásemgúl Baltasheva Qazaqstanda qazirgi tańda aptasyna 6 kún qyzmet etetin 348 halyqqa qyzmet kórsetý ortalyǵy baryn atap ótti. Ortalyqtaǵy mamandardan eń kóp suralatyn qyzmet - mekenjai anyqtamasy ekeni habarlanyp otyr.
«1 qarashadan bastap mekenjai anyqtamasyn alyp tastaimyz. Bizdiń elimizdiń azamattary osyǵan deiin 10 mln ret osy anyqtamany alý úshin HKO-larǵa kelgen. Qazirgi ýaqytta atalmysh anyqtamany alýdyń qajeti joq. Sebebi, bizdiń tehnikalyq qyzmetkerler óte aýqymdy jumysty atqaryp, barlyq júieni úilestirdi», - dedi Ásemgúl Baltasheva.
Iaǵni, 1 qarashadan bastap azamattar mekenjaiynyń qaida ekenin egov.kz portalynan bile alady.
Eske sala ketsek, Ishki ister ministrligi Qazaqstanda mekenjai anyqtamasy joiylatynyn buǵan deiin habarlaǵan bolatyn.
«Azamattardy tirkeý týraly málimetterdi berý eń suranysqa ie memlekettik qyzmetterdiń biri bolyp sanalady. Jyl saiyn halyq qujattardy, jeńildikterdi, járdemaqylardy jáne basqa da qyzmetterdi alý úshin memlekettik organdar men uiymdarǵa 10 millionnan astam mekenjai anyqtamasyn suratady. Azamattar jumysqa, mektepterge, balabaqshalarǵa, emhanalarǵa, bankterge jáne taǵy basqa jerlerge ornalasý kezinde únemi HQKO-na, memlekettik organdarǵa júginýge májbúr bolady, kezekte kóp ýaqytyn joǵaltady», - dep habarlady IIM-nen.
