Foto:adyrna.kz
«Materialdyq emes mádeni murany qorǵaýdy zańnamalyq qamtamasyz etý týraly» zań jobasy qazir Parlamenttiń tómengi palatasynda ázirlenip jatyr. 21 qarashada osyǵan bailanysty taqyryptyq otyrys ótti, -dep habarlaidy ult.kz.Májilistiń Áleýmettik-mádeni damý komitetinde ótken dóńgelek ústel otyrysynda kóptegen máseleler men usynystar talqylandy. Atap aitatyn bolsaq, elimizde materialdyq mádenietke jatpaityn rýhani muralar men qundylyqtardy zertteitin mekeme qurý usynyldy. Bul týraly Áleýmettik-mádeni damý komitetiniń tóraǵasy, Májilis depýtaty Ashat Aimaǵambetov málimdedi.
«Ózindik ereksheligimizdi saqtap qalýda, urpaqtar bailanysynda, jahandaný zamanynda ulttyq qundylyqtardy saqtap qalýdyń birden bir joly – materialdyq emes mádeni muramyzdy qorǵaý. Sondyqtan rýhani muralarymyzdy saqtap, ilgeriletý baǵytyndaǵy usynystaryńyzdy kútemiz. Bul bir ǵana jiyn ótkizip, kete beretin másele emes. Sol siiaqty sizderdi zań jobasymen ainalysyp, birlesip jumys isteýge shaqyramyz. Arnaiy institýt kerek dep jatyr, meniń oiymsha ǵylymi-zertteý ortalyq mindetti túrde kerek. Zańdy tulǵa, uiym ainalyspasa, nátije bolady dep aitý qiyn», - dedi Ashat Aimaǵambetov dóńgelek ústel otyrysynda.
Jiynǵa qatysýshylardyń barlyǵy elimizdegi materialdyq emes mádeni muralardy saqtaý men qorǵaýdy zań júzinde bekitýdiń mańyzdy ekenin aityp ótti.
«Búgin biz óte mańyzdy máseleni talqylap otyrmyz. Rasynda da Materialdyq emes mádeni muralardy qorǵaý týraly zań kerek. Ony Mádeniet týraly zańnyń bir taraýshasy retinde qaraý aqylǵa qonymsyz nárse», - deidi Amanjol Dúisenbaiuly.
Odan bólek elimizdiń aýmaǵynda materialdyq emes mádeni muralardy, ulttyq qundylyqtardy dáripteýdi túrli áleýmettik jeliler arqyly júzege asyrýdy qolǵa alý usynyldy. Bul týraly Májilis depýtaty Amanjol Dúisenbaiuly óz baiandamasynda aitty.
“Marketing pen brending boiynsha. Dombyra, kúi óneri, qusbegilik, aitys, kiiz úi siiaqty elementterdi áleýmettik jeli arqyly qarqyndy formatta nasihattaý kerek dep oilaimyn. Qazir jastarymyz áleýmettik jeli arqyly boiyna neni sińiredi? Atys pen shabysty, túrli adamnyń sanasyn ýlaityn, las aqparattarmen ýlanyp jatqan kezde biz kerisinshe immýntetimiz qalyptasý úshin, ulttyq qundylyqtarymyzdy, mádeni muralarymyzdy áleýmettik jeli arqyly qarqyndy formatta nasihattai bilsek bulda óziniń oń nátijesin beredi dep oilaimyn”,- dedi Májilis depýtaty Amanjol Dúisenbaiuly.
