Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine aýdandyq, qalalyq jáne aýyldyq bilik deńgeileriniń derbestigi men jaýapkershiligin keńeitý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaidy QazAqparat.
Zań jobasy Memleket basshysynyń «Cyndarly qoǵamdyq dialog – Qazaqstannyń turaqtylyǵy men órkendeýiniń negizi» atty Qazaqstan halqyna Joldaýyn iske asyrý maqsatynda ázirlendi.
Zań jobasynda birqatar normativtik quqyqtyq aktilerge ózgerister men tolyqtyrýlar engizý usynylady:
- aýdandyq mańyzy bar qalalardyń, aýyldardyń, kentterdiń jáne aýyldyq okrýgterdiń kiris bazasyn keńeitý;
- biýdjettik rásimderdi ońailatý;
- ákimshilik-aýmaqtyq birlikterge qoiylatyn talaptardy jetildirý;
- jergilikti ókildi jáne atqarýshy organdardyń derbestigin keńeitý jáne jaýapkershiligin kúsheitý.
«Usynylǵan negizgi normalarǵa tolyǵyraq toqtala keteiik. Biýdjetti nyǵaitý maqsatynda jergilikti ózin-ózi basqarýdy damytý biýdjettiń tórtinshi deńgeige qosymsha salyqtar men tólemderdiń 4 túrin berý usynylady. Sonymen qatar, aýyldyq okrýgter ákimi apparatynyń rezervin qurý usynylady. Bul qarajat jergilikti qoǵamdastyqtyń bastamasy boiynsha kezek kúttirmeitin shyǵyndarǵa baǵyttalatyn bolady jáne óz kiristeriniń on paiyzynan aspaidy.
Joǵary turǵan deńgeilerdegi biýdjetke uqsas aýyldyq okrýg ákimi apparaty úshin biýdjetke túzetýler engizý kózdelip otyr», - dedi QR Ulttyq ekonomika ministri Áset Erǵaliev.
Onyń aitýynsha, qarjy jyly kezeńinde aýdan jáne aýyldyq okrýg biýdjetteri arasyndaǵy jalpy sipattaǵy transfertter kóleminiń ózgerýine jol bermeitin Biýdjet kodeksine naqtylaýshy norma engiziledi. Sondai-aq, máslihattardyń sheshimderin ádilet organdarynda tirkeý qajettiligi boiynsha normany alyp tastap, biýdjetterdi bekitý rásimin ońailatý usynylyp otyr.
«Ákimshilik-aýmaqtyq birlikter sanatyn ózgertý tártibin anyqtaýdy usynamyz. Osy Zańda belgilengen talaptarǵa sáikes kelmegen jaǵdaida qala mártebesin bes jyl ishinde, al aýyldar – úsh jyl ishinde ózgertý júzege asyrylady. Iaǵni jergilikti atqarýshy jáne ókildi organdar osy kezeńde eldi mekenderdiń odan ári keleshegin eskere otyryp, ekonomikalyq damýy úshin sharalar qabyldaýy tiis», - dedi ministr.
Budan bólek, máslihat pen onyń depýtattarynyń mártebesin arttyrý boiynsha birqatar túzetýler qarastyrylǵan. Máslihat sessiiasy tóraǵasynyń qyzmetin taratyp, onyń ókilettigin máslihat hatshysyna berý usynylady. Sonymen qatar, árbir oblys pen respýblikalyq mańyzy bar qalalarda máslihattyń turaqty komissiia tóraǵalarynyń bosatylǵan eki laýazymyn engizý usynylady.
«Bul zań jobasy óńirlerdiń derbestigi men jaýapkershilik deńgeiin arttyrýǵa jáne jergilikti mańyzy bar máselelerdi neǵurlym jedel sheshý úshin biýdjettik rásimderdi aitarlyqtai jeńildetýge múmkindik beredi», - dedi Á. Erǵaliev.
