Qazaqstanda maska shyǵaratyn barlyq meditsinalyq zaýyttar memleket tarapynan baqylaýǵa alynady. Bul týraly QR Densaýlyq saqtaý ministri Eljan Birtanov «Eýraziia Birinshi» arnasynyń «Basty Prime» baǵdarlamasynda aitty, dep habarlaidy QazAqparat.
«Maskaǵa qatysty aitar bolsam, bizde infektsiia bolmaǵan kezde ony taǵyp júrý qajettiligi joq edi. Maskalardy satyp alyp qoiý qajettigin kóp aittyq. Ókinishke orai, maskalardy jappai satyp alyp, satylymǵa shyǵarǵanyn kórip otyrmyz. Qazir qoimalarda jatqan maskalardy taýyp jatyrmyz. Shetelge shyǵarylmaq bolǵan, biraq biz tyiym salǵannan keiin birýler tastap ketken maskalar da tabyldy. Búginde maskamen problema bar ekendigin moiyndaimyz. Qazir jumysqa, ujymnyń ortasyna baratyn kezde meditsinalyq betperde qajet. Al adam úide karantinde otyrsa oǵan maskanyń esh qajeti joq», - dedi ministr.
Osy rette ol maska tapshylyǵyn joiý úshin qandai jumys atqarylyp jatqanyn aitty.
«Osy ýaqyttyń ishinde maska óndirisin eki esege jýyq ulǵaittyq. Buryndary 200-300 myń shyǵarylady desek, qazir 500 myńǵa jýyqtap qaldyq. Birqatar óńirde tigin tsehyn iske qostyq. Biraq, maskany qajettilik bolsa, máselen qalaǵa shyqqan kezde satyp alyp taqqan jón. Táýlik boiy onyń taǵyp júrýdiń esh qajettiligi joq. Odan da qol tazalyǵyn saqtaǵan barynsha mańyzdy. Qazirgi ýaqytta karantindegi qalalardy maskamen qamtamasyz etý úshin barlyq sharany qabyldap jatyrmyz», - dedi Eljan Birtanov.
Sonymen qatar ministr koronavirýs kúdigine ilikken adamdardy qaraýmen, tasymaldaýmen ainalysatyn jedel jerdem qyzmetkerlerin, politsiia qyzmetkerlerin tegin maskamen qamtamasyz etý mańyzdy bolyp otyrǵanyn aitty.
«Keshe memlekettik komissiia bul turǵyda naqty sheshim qabyldady. Eń aldymen qandai da bir qaperge alynbaǵan jaittar oryn almaýy úshin maska shyǵaratyn barlyq meditsinalyq zaýyttar baqylaýǵa alynady. Buǵan qosa, búkil logistikany baqylaimyz. Eger buǵan deiin memleket aýrýhanalar úshin ǵana maskalardy satyp alýǵa jaýap berse, endigi ýaqytta belgili bir dárihanalarǵa jetkizilýin qadaǵalaimyz. Komissiia sheshimine sáikes, maskalar belgili bir baǵamen dárihanalarǵa jetkiziledi», - dedi ol.
