«Qazaqstan» teleradiokorporatsiiasy jańa «Abai tv» mádeni-aǵartý telearnasynyń resmi tanystyrylymyn ótkizdi, – dep habarlaidy «Ult aqparat».
Aqparat keńistigine «Aqyl oidyń ainasy» degen uranmen jol tartqan «Abai tv» telearnasy ulttyq jáne álemdik óner men mádeniettiń injý-marjanyn, túrli ulttardyń ádebi jáne tarihi mura jaýharlaryn, spektakl, balet siiaqty bekzada óner túrlerin qalyń buqaraǵa usynady.
Dáýren Abaevtyń aitýynsha, mádeniet óziniń órkeniettik rólinen basqa árqashan mańyzdy missiiany atqaryp keldi. Ol tarihtyń eń aýyr sátterinde halyqtarǵa kúsh pen úmit berdi.Onymen tildesý - bul ulttyń rýhani ómirin baiytýdyń tásili ǵana emes, sonymen birge, azamattarǵa materialdyq kómek kórsetýmen qatar, olarǵa moraldyq turǵydan qiyn jaǵdaida kómektesýge tyrysatyn memlekettiń mańyzdy áleýmettik missiiasy.
«Búgin tusaýy kesiletin jańa telearna mádeni-aǵartýshylyq salaǵa úles qosýdy, ult qazynasyn toltyrýdy kózdeidi. Jańa arnanyń «Abai» dep atalýy tegin emes. Birinshiden, mádeni-aǵartý baǵytyndaǵy jalǵyz telearnaǵa ult rýhaniiatynyń temirqazyǵy Abaidyń atyn berý - óte oryndy. Óitkeni uly aqynnyń ónegeli joly áli talai ǵasyrǵa jalǵasatyn bolady. Ekinshiden, jańa telearna tól mádenietimiz ben dástúrimizdi nasihattaýdy maqsat etip otyr. Bul týraly uly oishyldyń «paida oilama, ar oila», «talap qyl artyq bilýge», «ásempaz bolma árnege, ónerpaz bolsań arqalan» degen ósietterin este ustaýymyz kerek. Sondai-aq ol óner men kásip úirenýdi bailyqtyń kiltine, ulttyń qýatyna balaǵan. Uly aqyn taǵy bir sózinde «adam balasyn zaman ósiredi» deidi. Bizdiń jańa telearnamyzdyń jumysy da osy qazirgi dáýirdiń talabyna beiimdeledi. Ziialy qaýymnyń basty boryshy – qoǵamǵa, ásirese jastardyń boiyna tárbieni, izgilikti, otansúigishtikti darytý. Jańa telearna osy jolda sizderge utymdy qural, ashyq pikir alańy bolady dep oilaimyn. Osy turǵyda «Abai» telearnasynyń ashylýy uly kemeńgerdiń mereitoiy aiasyndaǵy shoqtyǵy biik shara deýge bolady», - dediQR Prezidenti Ákimshiligi Basshysynyń birinshi orynbasary Dáýren Abaev.
«Abai tv» arnasynyń ashylýy qazaq qoǵamy úshin úlken mereke. Órkenietimiz men mádenietimiz úshin mańyzdy arnalardyń biri bolady dep senemin. Mádeniet salasyndaǵy azamattardy telearnaǵa ónimderi men ónerlerin usynýǵa shaqyramyn» - dep atap ótti Mádeniet jáne sport ministri Aqtoty Raiymqulova.
Jańa telearna Memleket basshysynyń tapsyrmasymen iske qosyldy jáne qazaqstandyqtardy uly Abai murasy, Qazaqstannyń jáne búkil álemniń mádenieti men óneriniń jetistikterimen tanystyrýǵa arnalady. Osy baǵyttaǵy «Abai jolyn birge oqiyq», «Sarasóz» baǵdarlamalary jaryqqa shyqty. Odan bólek, baǵdarlamalar kestesine qazaq qalamgerleriniń dramalyq shyǵarmalaryn taldaýǵa arnalǵan «Úrker», jastardyń «Jyr maidany», qazaq mýzykasy mádenieti men tarihy jaiyndaǵy «Mýzyka Velikoi stepi», spektaklder men balet qoiylymdaryna arnalǵan «Premery» baǵdarlamasy kórermenge jol tartty.
«Osy bir kezdiń ózinde qiynshylyqqa qaramastan, jańa telearnanyń ashylýy, soǵan barlyq múmkindikti jasaý igi isterdiń biri. Abaidyń aty - óte ardaqty. Osy arnada qyzmet etetin qyz-jigitterdiń moinyna óte aýyr júk artylady. Abai atyn ielengennen keiin Abaidyń ádildigin, oishyldyǵyn, sózge degen erekshe yqylasyn, ǵajaiyp jyrlary men ánderindegi náziktik pen sulýlyqty saqtap, sol biikten kórinińizder», - dep, jazýshy, QR Eńbek sińirgen qairatkeri Sultan Orazaly jańa arnaǵa izgi tilegin bildirdi.
Telearna qazaq jáne orys tilderinde táýligine 17 saǵat (07:00-den 00:00-ge deiin) habar taratatyn bolady. Arna «Otau TV» ulttyq spýtniktik operatory, «Alma TV», «ID TV» kabeldik jelileri arqyly taralady. www.abaitv.kz resmi saity arqyly onlain kórý múmkindigi bar.
