Densaýlyq saqtaý ministriniń birinshi orynbasary Marat Shoranov Qazaqstanda lokdaýn jariialaý yqtimaldyǵy týraly pikir bildirdi, dep habarlaidy QazAqparat.
«Bizdiń jumys tobymyz jalpy epidemiologiialyq ahýalǵa sáikes boljamdaryn jańartýda. Kelesi aidyń ishinde naýqastardyń sany kóbeiedi dep eseptep otyr. Onyń sany pessimistik stsenarii boiynsha qazirgi jaǵdaidan 2 esege deiin kóbeiýi múmkin. Ózderińiz bilesizder, biz óz boljamdarymyzdy úsh stsenarii boiynsha jasaimyz. Eń birinshi maqsatymyz – qazirgi qalalyq aýrýhanalarda tósek-oryn júktemesin kóbeitpeý», - dedi vitse-ministr.
BAQ ókiliniń lokdaýn jariialaý yqtimaldyǵy týraly saýalyna jaýap bergen vedomstvo ókili qazir respýblika boiynsha statsionarlyq tósekterdiń júktelimi 37 paiyzǵa jetkenin atady.
«Biz tósek júktemesi boiynsha erejelerden áli bas tartyp otyrǵan joqpyz. Sol erejeni mindetti túrde saqtaimyz. Respýblika boiynsha tósek oryndardyń 37 paiyzy júktelgen. Óz baiandamamda aityp ketkendei, 70 paiyzǵa jetken mezgilde qosymsha tósek oryndaryn ashamyz. Al 70 paiyzdan kóterilse, sol kezde árine ondai sheshim qarastyrý kerek», - dedi Marat Shoranov.
Onyń aitýynsha, sońǵy aptada delta shtamnyń taralýy ótken aptaǵa qaraǵanda respýblikanyń barlyq óńirlerinde ósip, syrqattaný kórsetkishiniń ósimi 1,9 ese bolǵan.
