Qazaqstanda lańkestik pen ekstremizm úshin sottalǵandardyń keskini jasalady. Bul týraly búgin QR IIM Qylmystyq-atqarý júiesi komitetiniń basqarma bastyǵy Bekbolat Shákirov aitty, dep habarlaidy QazAqparat tilshisi.
«Biyl bizde táýekelderdi baǵalaý júiesin júrgizý josparlanǵan. Bizge sottalýshy keskinin qurastyrý úshin áleýmettik zertteý júrgizý qajet. Bul úshin BUU-nyń Esirtki jáne qylmystar jónindegi basqarmasymen, múddeli memlekettik organdarmen, jetekshi jáne beiindi oqý oryndarymen birlesip, osy jyldyń ishinde áleýmettik zertteý bastaýdy josparlap otyrmyz. Ol munan ary táýekelderdi baǵalaý júiesin ázirleý úshin qajet», - dedi basqarma basshysy.
Onyń sózine qaraǵanda, shilde aiynyń sońynda Qazaqstanǵa Kanadadan táýekelderdi baǵalaý jónindegi halyqaralyq sarapshy keledi.
«Atalǵan sarapshy bizdiń qyzmetkerlerimiz úshin táýekelderdi baǵalaý júiesi boiynsha trening ótkizedi. Bul táýekelderdi tsifrlyq baǵalaý bolmaq. Iaǵni, onda saýaldar tizbesi qurastyrylady. Bizge túsken sottalýshyǵa maqsatta suraqtardy qoiamyz jáne nátijesi birden shyǵady. Qazaqstanda Hanafi mazhaby moiyndalǵan. Sondyqtan sottalýshyda bul mazhabtan qandai da bir aýytqýshylyq baiqalsa, onda biz onymen maqsatty túrde aqparattyq túsindirý jumystaryn júrgizemiz», - Bekbolat Shákirov.
Aita keteiik, elordada BUU Esirtki jáne qylmystar jónindegi basqarmasy men QR IIM Qylmystyq-atqarý júiesi komitetiniń «2018-2021 jyldarǵa arnalǵan ektremistik jáne lańkestik baǵyttaǵy qylmystar úshin sottalǵandarmen jumysty kúsheitýge, penitentsiarlyq mekemelerde radikaldyq zorlyq-zombylyqtyń aldyn alýǵa qoldaý kórsetý» birlesken baǵdarlamasyn júzege asyrýdy úilestirý keńesiniń birinshi otyrysy ótip jatyr.
Sharaǵa QR SIM, AQDM, BǴM, UQK, Bas prokýratýra, Eýropalyq odaq ókildigi, Qazaqstandaǵy Niderlandy koroldigi, Japoniia, Germaniia Elshilikteriniń ókilderi qatysýda.
