Foto: ashyq derekkóz
Qazaqstan Respýblikasy Densaýlyq saqtaý ministrligi halyq úshin mańyzdy dári-dármekterdiń qoljetimdiligin arttyrý maqsatynda iri farmatsevtikalyq kompaniialarmen memorandýmǵa qol qoidy. Qujatqa sáikes, áleýmettik mańyzy bar jáne qymbat preparattardyń baǵasy tómendeidi, dep habarlaidy Ult.kz.
Memorandýmǵa «Himfarm» AQ, «Johnson & Johnson Kazakhstan» JShS jáne «AstraZeneka Qazaqstan» JShS syndy jetekshi kompaniialar qol qoidy. Densaýlyq saqtaý ministri Aqmaral Álnazarovanyń aitýynsha, bul kelisimder farmatsevtikalyq naryqty turaqtandyryp, zamanaýi emge qoljetimdilikti keńeitedi ári eldegi investitsiialyq ahýal men óndiristi jergiliktendirýge jol ashady.
«AstraZeneka» kompaniiasy bólshek jáne kóterme saýdada satylatyn birqatar mańyzdy preparattardyń baǵasyn tómendetpek. Bul jańalyq milliondaǵan patsientke qajetti dári-dármekpen qamtamasyz etilýge múmkindik beredi.
Al «Johnson & Johnson» kompaniiasy sirek kezdesetin ári ómirge qaýip tóndiretin julyn bulshyqet atrofiiasyn emdeitin Spinraza (Nýsinersen) preparatynyń qunyn qaita qaraýǵa kelisti. Bul memlekettik shyǵyndardy ońtailandyryp, patsientterge uzaqmerzimdi dárilik qoldaý kórsetýdi jeńildetpek.
Taǵy bir mańyzdy qadam – «Himfarm» AQ-men memorandým. Kompaniia 2 tipti qant diabetin emdeýge arnalǵan Dapagliflozin preparatynyń satyp alý baǵasyn tómendetýge daiyn ekenin jetkizdi. Qazaqstanda bul aýrýmen 520 myńnan astam adam tirkelgen.
Memorandýmda mynadai negizgi baǵyttar qamtylǵan:
-
dári baǵasyna ruqsat etilgen ústemelerdi saqtaý;
-
baǵa dinamikasyn baqylaý;
-
úzdik halyqaralyq tájiribemen almasý;
-
innovatsiialyq preparattardy qarjylandyrý tetikterin damytý;
-
dári-dármekpen qamtamasyz etýge qatysty zańnamany jetildirý.
Ministrlik barlyq farmatsevtikalyq naryq qatysýshylaryn halyqtyń densaýlyǵyn jaqsartýǵa jáne meditsinalyq kómektiń sapasyn arttyrýǵa baǵyttalǵan áleýmettik jaýapty qadamdardy qoldaýǵa shaqyrdy.
