Foto: Akorda.kz
Qasym-Jomart Toqaevqa eldegi kriminogendik jaǵdai jáne ishki ister organdarynyń «Zań men tártip» qaǵidatyn iske asyrý barysy jóninde aqparat berildi, dep habarlaidy Ult.kz.
Prezidentke elimizde qabyldanǵan keshendi sharalar nátijesinde byltyr qylmys sany 12,7 myńǵa azaiǵany baiandaldy.
Sońǵy jyldary qylmys deńgeiiniń, ásirese, kisi óltirý, qaraqshylyq, tonaý men urlyq siiaqty asa aýyr qylmys túrleri kórsetkishteriniń aitarlyqtai tómendeýi baiqalady. Sonymen qatar tergeýdiń zamanaýi ádisterin engizý arqyly qylmystyń barlyq sanaty boiynsha ashylýy jaqsara túsken.
Erjan Sádenov qylmyskerlerdi izdestirý jumystarynyń nátijesi týraly aitty. 2024 jyly politsiia izdeýde júrgen 1949 adamdy ustaǵan.
"Memleket basshysyna uiymdasqan, kiber jáne esirtki qylmystaryna qarsy is-qimyl, sondai-aq quqyqbuzýshylyqtardyń aldyn alý jónindegi tapsyrmalarynyń oryndalý barysy tanystyryldy. Sonyń ishinde uiymdasqan qylmystyq topqa qatysqany úshin 264 adam qylmystyq jaýapkershilikke tartylǵan", – delingen Aqorda habarlamasynda.
Ministrdiń aitýynsha, sońǵy 12 aida esirtki taratýǵa qatysty aqparat jariialaǵan 7500-ge jýyq internet-resýrs anyqtaldy, 22 tonnaǵa jýyq esirtki ainalymǵa jiberilmedi, 64 esirtki zerthanasy joiyldy. Internet-alaiaqtardyń 65 million qońyraýy buǵattaldy. Nómirlerdi aýystyrýǵa arnalǵan 48 SIM-box qurylǵysy áshkerelendi. Alaiaqtardyń 2 milliard teńgeden astam qarjyny elden shyǵarýyna jol berilmedi.
Vedomstvo basshysy kámelet jasyna tolmaǵandardyń quqyǵyn qorǵaý, kóshi-qondy baqylaýdy kúsheitý, jol qaýipsizdigin qamtamasyz etý, qylmystyq-atqarý júiesin jetildirý jónindegi sharalar týraly habardar etti.
Kezdesý sońynda Qasym-Jomart Toqaev eldegi quqyqtyq tártip pen qoǵamdyq qaýipsizdik deńgeiin odan ári arttyrý boiynsha birqatar tapsyrma berdi.
