«QR keibir zańnamalyq aktilerine memlekettik qyzmetter kórsetý máseleleri boiynsha ózgerister men tolyqtyrýlar engizý týraly» Zańynda tolyqtyrýlar oryn aldy. Endi Qazaqstanda qujattarǵa qosarlanǵan esim jazýǵa ruqsat berildi, – dep habarlaidy «Ult aqparat».
«Qosarlanǵan esim berý máselesi qazaqstandyqtar arasynda túsinispeýshilik týǵyzyp otyr. Iaǵni, bala qujatyndaǵy ákesiniń qosarlanǵan esimi boiynsha túzetý engizilip otyr. Buǵan deiin ákeniń aty tek birge jazylatyn nemese qosarlanǵan esimniń bireýi ǵana beriletin. Iaǵni, ákesiniń aty Asan-Áli bolyp, defispen jazylsa, bala qujatynda Asanuly nemese Áliuly ne bolmasa defissiz Asanáliuly bolyp birge jazylatyn. Zań jobasynda bul másele qaraldy jáne defispen jazýǵa ruqsat berildi» dedi Maira Aisina QR Prezidenti janyndaǵy Ortalyq kommýnikatsiialar qyzmetinde ótken baspasóz máslihatynda.
Aita keteiik, 2019 jyldyń 7 qarashasynda Parlament Senatynyń jalpy otyrysynda «Qazaqstan Respýblikasynyń keibir zańnamalyq aktilerine memlekettik qyzmetter kórsetý máseleleri boiynsha ózgerister men tolyqtyrýlar engizý týraly» Zańy qabyldandy. Zań jobasy Qazaqstan Respýblikasynyń memlekettik kórsetiletin qyzmetter salasyndaǵy zańnamasyn jetildirý maqsatynda ázirlendi.
