Sýret: ashyq derekkóz
Biyl kúzde 175 myń jasóspirim qyz balaǵa papilloma virýsyna qarsy vaktsina egiledi. Oǵan Úkimetten 9,7 mlrd teńgeden astam qarjy bólindi, dep habarlaidy 31 arnanyń Informbiýro aqparattyq baǵdarlamasy.
Endi qarajat aimaqtarǵa úlestirilip, ekpe satyp alynbaq.
Eki kezeńnen turatyn ekpeniń birinshisi on bir jastaǵy oqýshy qyzdarǵa salynady. Al ekinshisi alty aidan keiin egiledi. Mamandardyń aitýynsha, eki kezeńge bólingen vaktsina jatyr moiny obyrynyń aldyn alady. Sondai-aq, densaýlyqqa keri áseri joq.
"Adam papilloma virýsy kóptegen qaýipti aýrýlardy shyǵarady. Olardyń ishinde eń birinshi jatyr moiny qaterli isigi. Ol 99 paiyz dál osy virýstan bolady. Kóptegen el 15-16 jyl buryn bastaǵan. Olardyń qorytyndylary bizge osyndai úlken nátijesi bar ekenin jáne qaýipsiz ekenin dáleldegen", – dedi onkolog-ginekolog dáriger Raihan Bolatbekova.
Adam papillomasy virýsyna qarsy vaktsinatsiialaý sharalary 2013-2015 jyldary pilottyq joba retinde elimizdiń 4 aimaǵynda júrgizilgen bolatyn. Onda da oqýshy qyzdardyń ata-anasynyń ruqsatymen egilgen edi. Nátijesinde 11 myńnan astam qyz bala ekpeniń eki dozasyn alǵan.
"Qoldanylatyn vaktsina tórt valentti. Osy adam papillomasy virýsynyń onkogendik tipterine, iaǵni tórt tipine qarsy josparlanǵan. Bul vaktsina – Merk kompaniiasy, AQSh-ta shyǵarylady", – dedi QR DSM Sanitariialyq-epidemiologiialyq baqylaý komitetiniń basqarma basshysy Nurshai Ázimbaeva.
Statiskatikaǵa súiensek, jylyna 1900-ge jýyq qyz-kelinshek qaýipti dertke shaldyǵady. Onyń 600-i dál osy aty jaman aýrýdan kóz jumǵan, sondyqtan aq halattylar ýaqytyly tekserilip, meditsinalyq kómekke júginý kerektigin eskertedi.
"Bizde garnatiialyq meditsinalyq kómek aiasynda kórsetiletin ártúrli skriningter, ár túrli zertteýlerden jyl saiyn ótip turatyn bolsa, erkekter men áielder ýaqytyly tekserilip tursa, qaterli isiktiń aldyn alýǵa nemese ony bastapqy satyda anyqtaýǵa múmkindik beriletin bolady. Al qarjy óńirlerge úlestirilip, 351 myńnan astam vaktsina satyp alynady. Tegin ekpe oqýshy qyzdardyń ata-anasynyń jazbasha kelisimimen egildi", – dedi radiolog dáriger Ońdasyn Aqjol.
