QR Premer-ministri Asqar Mamin úi janýarlary arasynda ekzotikalyq aýrýlardyń órshýine qarsy kúres sharalaryn aityp berdi, dep habarlaidy QazAqparat.
«Nodýliarlyq dermatitke qarsy is-qimyl maqsatynda «Biologiialyq qaýipsizdik problemalary ǵylymi-zertteý institýty» RMK 2019 jyly vaktsina ázirlendi jáne qazir osy aýrýǵa qarsy vaktsina QR Aýyl sharýashylyǵy ministrligine jetkizilip jatyr. Búgingi tańda Qazaqstanǵa shekaralas Resei Federatsiiasy oblystarynda joǵary patogendi qus tumaýynyń (JPT) jáne afrikalyq shoshqa obasynyń oshaqtary tirkelýde. Epizootiialyq ahýal 2020 jylǵy tamyzdan qarashaǵa deiin elimizdiń 8 oblysynda JPT-nyń 95 oshaǵy tirkelgenin kórsetedi», - dep jazdy Asqar Mamin depýtattyq saýalǵa bergen jaýabynda.
Onyń aitýynsha, JPT órshýi kezeńinde veterinariialyq preparattardyń respýblikalyq qorynan qustardy májbúrli túrde vaktsinatsiialaýdy júrgizý úshin 220,7 mln teńgege jospardan tys qosymsha 4,3 mln doza vaktsina bólindi. Josparly profilaktikalyq sharalar aiasynda qustardy josparly vaktsinatsiialaý úshin JPT-ǵa qarsy vaktsinanyń 3,4 mln dozasy bólingen.
Veterinariialyq-sanitarlyq talaptarǵa sáikes JPT-men aýyratyn barlyq qustar joiyldy jáne olardyń ielerine ortasha ailyq naryqtyq quny boiynsha ótem jasaldy. Joǵaryda kórsetilgen kezeńde barlyǵy 1,971 mln qus tárkilendi jáne joiyldy, onyń 97%-y 4 qus fabrikasyna tiesili (Soltústik Qazaqstan oblysy – 2, Qostanai oblysy – 1 jáne Almaty oblysy – 1).
«2020 jyldyń qorytyndysy boiynsha Úkimet tárkilengen jáne joiylǵan aýrý qustardyń qunyn óteý úshin respýblikalyq biýdjetten 3 mlrd teńge bóldi. Sonymen birge QR Bas prokýratýrasy anyqtaǵan buzýshylyqtardy joiý boiynsha 2021-2023 jyldarǵa arnalǵan is-sharalar jospary ázirlendi jáne bekitildi. Atalǵan sharalar jospary aýyl sharýashylyǵy janýarlaryn sáikestendirý, veterinariialyq-profilaktikalyq is-sharalardy josparlaý, veterinariialyq preparattardyń sapasyn baqylaý, veterinariia salasynda aǵartý jumystaryn júrgizý jáne tsifrlandyrý qyzmetterin nyǵaitýǵa baǵyttalǵan sharalardy qamtidy», - deidi A. Mamin.
