Qostanai oblysy Arqalyq qalasynda quny 220 mln teńgelik meshit satylymǵa shyǵaryldy. Bul týraly NUR.KZ portaly krisha.kz saityna silteme jasap habarlaidy.
"Arqalyq qalasynda 600 adamdyq meshitti satamyn. Ǵimarat 85-90%-ǵa ázir. Jeri - 300 sotyq. Jalǵa berý usynysyn da qarastyramyn. Jylyna 200 myń teńgege. Ǵimaratty ózge bizneske ózgertýge ázir seriktesti de izdestirýdemiz. Qurylys materialdary bar", - dep jazǵan meshitti satatynyn málimdegen azamat.
Al, tilshi.kz saitynyń málimetine sáikes, meshit 220 million teńgege satylmaq. Ǵimarat "iesi" nysannyń 2000 jyly kirpishten turǵyzylǵanyn aitýda. Jaǵdaiy jaqsy. Internet júiesi bar. Sonymen birge, qaýipsizdik maqsatynda terezeleriniń torlanǵany aitylǵan. Signal berý qondyrǵylarymen jabdyqtylǵan.
Habarlandyrý sońynda nysandy saýdaǵa shyǵaryp otyrǵan adam iesi emes ekendigin, onymen tek elektrondy hat jazý arqyly bailanysýǵa bolatynyn aitqan. Habarlandyrý 12 naýryzda ornalastyrylǵan.
