Qazaqstanda kúnine 90-100 myń adam vaktsina alyp jatyr. Bul týraly QR Densaýlyq saqtaý ministri Aleksei Tsoi aitty, dep habarlaidy QazAqparat.
«Árine, biz vaktsinatsiia barynsha tezirek bitkenin qalaimyz. Bul rette júrgizip jatqan jumystarymyzdy kúsheite túsý qajet dep esepteimin. Óńirlermen ne istep jatyrmyz? Apta saiyn koronavirýspen kúres jónindegi vedomstvoaralyq komissiia ótedi. Onda biz óńirlerge aqparattyq-túsindirý jumysyn kúsheitý qajettigin aitamyz. Óitkeni, vaktsina erikti túrde salynady», - dedi ministr Ortalyq kommýnikatsiialar qyzmetindegi brifing barysynda.
Sonymen qatar ol sońǵy kúnderi elimizde vaktsinalaý qarqyny arta túskendigin basa aitty.
«Aitalyq, keshe shamamen 90 myń doza ekpe salyndy. Jalpy, sońǵy kúnderi 90-100 myń vaktsina salynyp jatyr. Iaǵni, biz bul jumysty kúsheite túsetin bolamyz. Qalai bolǵanda da kúzde 10 mln vaktsina salynady dep josparlap otyrmyz. Árine, vaktsina saldyrmaǵan, aýryp turǵannan keiin 6 aidan astam ýaqyt ótken azamattar kelip vaktsina alatyndyǵyna, qoldaý kórsetetindigine úmittenemiz. Óitkeni, ókinishke orai adamdar ekinshi ret qaita aýyryp qalyp jatyr. Bizge Qazaqstanda koronavirýs infektsiiasynyń tolqyndy taralýy bolmaýy úshin qorǵaný qajet», - dedi Aleksei Tsoi.
