Quqyq qorǵaý organdaryna qyzmetke qabyldaýdyń jańa tártibi jariialandy, dep habarlaidy "Ult aqparat" Bas prokýratýranyń resmi saityna silteme jasap.
Memleket basshysynyń tapsyrmasyn oryndaý úshin Bas prokýratýra quqyq qorǵaý organdarymen birlesip, shet elderdiń ozyq tájiribesin eskere otyryp, prokýratýra organdaryna, Sybailas jemqorlyqqa qarsy qyzmetke jáne ekonomikalyq tergeý qyzmetine kadrlardy irikteý men daiarlaýdyń biryńǵai tásilin ázirledi.
Buryn árbir organ qyzmetke kirý úshin kadr rezervin derbes qalyptastyrdy (konkýrs, rezervke qabyldaý, kandidattardy irikteý, qyzmetke qabyldaý, kadrlardy ornalastyrý).
Qazir zańnamadaǵy ózgeristerge sáikes («Quqyq qorǵaý qyzmeti týraly» Zańnyń 11-baby) quqyq qorǵaý qyzmetine kirýdiń mindetti sharty - QR Bas prokýratýrasy janyndaǵy Quqyq qorǵaý organdary akademiiasynda bastapqy kásiptik daiarlyqtan ótý bolady.
Akademiiaǵa túsý úshin joǵary bilimniń bolýy, moraldyq-psihologiialyq, meditsinalyq talaptarǵa sáikestigi, áshkereleitin málimetterdiń bolmaýy qajet.
Irikteýdiń negizgi kezeńderi: testileý, áńgimelesý, meditsinalyq jáne psihofiziologiialyq kýálandyrý, poligrafologiialyq zertteý jáne emtihan tapsyrý.
Akademiiada prokýratýra, sybailas jemqorlyqqa qarsy qyzmet jáne ETQ organdarynyń qatardaǵy, kishi jáne orta basshy quram laýazymdaryna alǵash ret túsetin adamdar oqi alady.
Oqý eki kezeńnen turady: Akademiiada oqý jáne quqyq qorǵaý organdarynyń bólimshelerinde taǵylymdama.
Prokýratýra organdaryna kandidattardy kásibi daiarlaý merzimi - 1 jyl (6 ai oqý jáne 6 ai taǵylymdama), sybailas jemqorlyqqa qarsy qyzmetke jáne ETQ kandidattary úshin - 6 ai (5 ai oqý jáne 1 ai taǵylymdama) .
Akademiiada oqýǵa professorlyq-oqytýshylyq quramnan basqa qoldanystaǵy praktikter, sheteldik sarapshylar, quqyq qorǵaý organdarynyń ardagerleri tartylatyn bolady.
Oqý kezinde bilim alýshylar ai saiynǵy stipendiiamen, tamaqpen jáne turǵyn-jaimen qamtamasyz etiledi.
Oqýdy sátti aiaqtaǵanda bir mezgilde birinshi synyptyq shen nemese biliktilik synyby berile otyryp, synaq merziminsiz laýazymǵa taǵaiyndalady.
Azamattar alǵashqy kásibi daiarlyqqa irikteý tártibimen Kadrlyq damytý basqarmasy bastyǵy orynbasarynyń suhbatynan jáne Bas prokýratýranyń vedomstvolyq saitynan tolyǵyraq tanysa alady.
Kásiptik daiarlyqqa irikteýdiń bastalý merzimi - 2020 jylǵy 24 tamyzdan 24 qyrkúiekke deiin.
