Parlament Májilisiniń jalpy otyrysynda «Qazaqstan Respýblikasynyń diplomatiialyq qyzmeti týraly» Qazaqstan Respýblikasynyń Zańyna ózgerister men tolyqtyrýlar engizý týraly» zań jobasyn maquldady, dep habarlaidy "Ult aqparat".
Zań jobasy qazaqstandyq diplomattardyń áleýmettik qorǵalýyn nyǵaitýǵa jáne diplomatiialyq qyzmet organdarynyń qyzmetin jetildirýge baǵyttalǵan.
«Zańǵa kelesidei ózgerister men tolyqtyrýlar engizý kózdelgen, iaǵni diplomatiialyq qyzmet ardagerleriniń áleýmettik qorǵalýyn jetildirý maqsatynda Zańda «Qazaqstan Respýblikasy diplomatiialyq qyzmetiniń ardageri» uǵymyn bekitý usynylady. Bul sanatqa zeinetkerlik jasqa tolǵan jáne keminde 25 jyl jalpy eńbek ótili bar, onyń ishinde Qazaqstan Respýblikasynyń diplomatiialyq qyzmet organdarynda 15 jyl jumys istegen adamdar jatqyzylatyn bolady», - dep túsindirdi Syrtqy ister ministri Muhtar Tileýberdi.
Onyń aitýnysha, Tótenshe jáne Ókiletti Elshi, halyqaralyq uiymdar janyndaǵy Turaqty (ókiletti) ókil qyzmetin atqarǵan nemese Tótenshe jáne Ókiletti Elshi diplomatiialyq dárejesi bar diplomatiialyq qyzmet ardagerlerine Qazaqstan Respýblikasynyń Úkimeti aiqyndaityn tártippen jáne mólsherde ai saiyn aqshalai tólem tólenetin bolady. Qajetti shyǵyndardy Respýblikalyq biýdjet komissiiasy biylǵy 11 tamyzda qoldady.
«Álemdik saiasat pen ekonomika salasynda irgeli jáne ǵylymi-qoldanbaly zertteýler júrgizý maqsatynda diplomatiialyq qyzmet organdary júiesine ǵylymi mekemelerdi kirgizý usynylady. Bul Syrtqy ister ministrligine qaraityn Syrtqy saiasi zertteýler institýtynyń mártebesin arttyryp, onyń qyzmetiniń negizgi baǵyttaryn bekitýge múmkindik beredi», - dedi ministr.
