«Qazaqstan» telearnasy 19 sáýirden bastap Túrkiiada túsirilgen Qoja Ahmet Iasaýi týraly telehikaiany kórermen nazaryna usynady, dep habarlaidy "Ult aqparat".
Túrkiia tarapy túsirgen bul telehikaia «Mavera» dep atalady. Mavera – (arab tilinde «kórinetin álemniń kórinbeitin arǵy jaǵy» degen maǵynany bildiredi) kóne Osmanly tilinde qoldanylǵan sóz. Qazaqsha «tylsym álem», «qarsy jaq», «basqa dúnie» dep aýdarýǵa bolady. Rejisser Iúdjel Húdaverdiniń bul filmi tartymdy ári qyzyqty oqiǵalarǵa toly.
Iasaýi týraly telehikaiany túrikter jańa formatta túsirgen. Onda Qoja Ahmet ómiriniń kópshilik bile bermeitin qyrlary, jalpaq jurtqa beimálim kezeńi kóbirek sýretteledi. Sondyqtan da bul telehikaia Qazaqstan kórermenderi úshin de qyzyqty bolary haq. Telehikaiada Iasaýidiń Arystanbaptan alǵan qurma dáneginiń qurma aǵashyna ainalý oqiǵasy, dárýishter hikaiasy, tarihtaǵy alǵashqy Alyp-erender oqiǵasy tartysty beriledi.
Esterińizge sala ketsek, QR Aqparat jáne qoǵamdyq damý ministri Aida Balaevanyń taiaýdaǵy Túrkiiaǵa jumys sapary barysynda Qoja Ahmet Iasaýi ómiri týraly teleserial premerasyn Qazaqstan men Túrkiiada bir mezgilde kórsetý týraly ýaǵdalastyqqa qol jetkizilgen bolatyn. Sonymen qatar eki el arasynda túrki jurtyna ortaq tarihi tulǵa – Qorqyt ata týraly birlesken serial túsirýge ýaǵdalastyq jasalǵan edi.
