Ekologiia, geologiia jáne tabiǵi resýrstar ministri Maǵzum Myrzaǵaliev elimizde taiaýda ǵana qabyldanǵan jańa ekologiialyq kodekstiń negizgi basymdyqtaryn atady, dep habarlaidy QazAqparat.
«Birinshiden, «Lastaýshy tóleidi jáne qalpyna keltiredi» qaǵidatynyń negizinde lastanýdyń aldyn alý jáne baqylaý boiynsha sharalar, sondai-aq qorshaǵan ortaǵa keltirilgen ziiannyń ornyn toltyrý úshin jaýapkershilik kózdelgen. Ekologiialyq ziian oryn alǵan jaǵdaida tabiǵat paidalanýshy qorshaǵan ortany bastapqy qalpyna keltirýge mindetti», - dedi Maǵzum Myrzaǵaliev OKQ-da ótken baspasóz máslihatynda.
Ministrdiń ekinshiden, atmosferalyq aýanyń, sýdyń, topyraqtyń lastaný problemasyn sheshý úshin ónerkásipte eń ozyq qoljetimdi tehnologiialardy engizý kózdelgenin málim etti. Bul rette birinshi kezeńde jalpy lastanýdyń 80% shyǵaryndylarynyń kózi bolyp tabylatyn 50 iri kásipornyna engizý josparlanǵan.
«Eýropada 15 jyl ishinde eń ozyq qol jetimdi tehnologiialardyń arqasynda ziiandy shyǵaryndylar 94%-ǵa azaityldy. Osy tehnologiialardy engizgen kásiporyndar emissiia úshin tólemnen bosatylady. Eger kásiporyndar qol jetimdi tehnologiialardy paidalanbasa, olardyń emissiia úshin tólem mólsherlemeleri edáýir artady», - dedi ol.
Maǵzum Myrzaǵaliev sonymen qatar qorshaǵan ortaǵa áserdi baǵalaýdyń jańa tásilderi (QOÁB) engizilgenin jetkizdi.
«Atap aitqanda biz qorshaǵan ortaǵa áserdi baǵalaýdan ótýdiń ádisterin jeńildettik. Búgingi kúni tabiǵat paidalanýshylardyń bári (shamamen 20 myń) QOÁB-tan rásiminen ótýde. Jańa ekokodekske sáikes qorshaǵan ortaǵa áserdi baǵalaýdyń mindetti protsedýrasynan tek birinshi sanattaǵy iri kásiporyndar ótedi. Bul shamamen 2600 kásiporyn. Osylaisha shynymen ekologiialyq qaýipti obektilerge basa nazar aýdarylady. Sonymen qatar, qoǵam ókilderi qorshaǵan ortaǵa áserdi baǵalaýdyń barlyq kezeńderine qatysady. Al ekinshi sanattaǵy obektiler skriningten ótedi. Iaǵni, qorshaǵan ortaǵa áserdi baǵalaýdy júrgizý qajet nemese qajet emes ekendigi anyqtalady. Úshinshi sanattaǵy obektiler habarlamalyq negizde jumys isteidi. Osylaisha ákimdikter úshinshi sanattaǵy obektilerden shyǵaryndylardyń, tógindilerdiń sany, jinaqtalatyn jáne beriletin qaldyqtardyń kólemi kórsetiletin deklaratsiialar qabyldaityn bolady. Tórtinshi sanattaǵy obektiler retteýden tolyq bosatylady», - dedi ol.
