QR Bas memlekettik sanitariialyq dárigeri Aijan Esmaǵambetova koronavirýs indetinen qaza tapqandardy jerleý algoritmi aiqyndalǵan qaýly shyǵardy, dep habarlaidy "Ult aqparat".
Atalǵan qaýlynyń qosymshasyna sáikes, COVID-19-ǵa kúdikti adam qaitys bolǵanda epidemiologiialyq tekserý jáne osy jaǵdaiǵa bailanysty basqa da is-sharalar epidemiiaǵa qarsy rejim talaptaryn saqtai otyryp tez arada júrgiziledi. SOVID-19 diagnozy zerthanalyq rastalǵan jaǵdaida qaitys bolǵan adamnyń denesi ashylmaidy jáne týystaryna berilmeidi. Al, COVID-19-ǵa kúdikti qaitys bolǵanda máiit zerthanalyq zertteý nátijesi shyqqansha týystaryna berilmeidi.
COVID-19-dan qaitys bolǵan adamnyń máiitin jerleýge (jýýǵa) daiyndaý aldynda qaitys bolǵan adamnyń betine virýlitsidti quralǵa molynan sýlanǵan maskany (sýlyqty) qoiý qajet.
Tabytsyz (ulttyq ádet-ǵuryp boiynsha) kómgen kezde COVID-19-dan qaitys bolǵan naýqastyń máiitin jýý prozektýrada júrgiziledi. Máiitti jýýǵa tartylǵan adamdar (3 adamnan artyq emes) jeke qorǵanysh quraldaryn kiedi (aljapqyshy bar sý ótkizbeitin halat, kózildirik, maska, qolǵap), dezinfektsiialaý eritindisimen jýady jáne paidalanylatyn preparattyń nusqaýlyǵyna sáikes kontsentratsiiadaǵy tiisti virýlitsidti dezinfektsiialaý eritindisi sińdiriletin mataǵa (kebin) oraidy. Sodan keiin dene polietilen plenkamen oralyp, tyǵyz mataǵa oralady. Jerleý kezinde aqyretti ashýǵa jáne qaitys bolǵan adamnyń betin ashýǵa tyiym salynady. Týystarymen qoshtasý jerleý is-sharasyn (janaza, «otpevanie» jáne t.b.) júrgizý úshin máiitti keminde 3 metr qashyqtyqta berýge ruqsat etiledi, bul rette máiit marqummen qoshtasý ornynda 1 saǵattan artyq bolmaýy tiis. Jerleý rásimine bir ǵana dini qyzmetkerdiń qatysýy tiis.
Tabytpen kómgen kezde qaitys bolǵan adamnyń máiiti paidalanylatyn preparattyń nusqaýlyǵyna sáikes kontsentratsiiadaǵy tiisti virýlitsidti dezinfektsiialaý eritindisi sińdirilgen mataǵa oralady. Sodan keiin dene polietilen plenkamen oralyp, qaitadan tyǵyz mataǵa oralady. COVID-19-dan qaitys bolǵan adamnyń máiiti jerleitin jerge metall nemese tyǵyz jabylǵan aǵash tabytta tasymaldanady.
Jerleý rásimi kezinde dene jabyq bolýy kerek, tabyt ta qaqpaǵymen jabylýy kerek. Jerleý rásimine tek jaqyn týystary ǵana jiberiledi.
