QR Densaýlyq saqtaý ministrliginiń Meditsinalyq jáne farmatsevtikalyq baqylaý komiteti tóraǵasynyń orynbasary Nurlybek Asylbekov Qaraǵandyda óndiriletin «Spýtnik V» vaktsinasy erikti negizde eń aldymen, qai sanattaǵy adamdarǵa egiletindigin aityp berdi, dep habarlaidy "Ult aqparat".
Qaraǵandydaǵy farmatsevtikalyq keshen koronavirýsqa qarsy reseilik «Spýtnik V» vaktsinasyn shyǵaratyn negizgi alań retinde iriktep alynǵan bolatyn. Qazirdiń ózinde zaýyttan shyǵarylǵan 6 myń doza «Spýtnik V» vaktsinasynyń tájiribelik partiiasy sapasyn tekserý úshin Reseige jiberildi.
Jalpy, atalǵan kásiporyn aqpan aiynda mundai vaktsinanyń - 80 myń, naýryzda - 150 myń, al odan keiin ai saiyn 600 myń dozasyn shyǵarýdy josparlap otyr. Qazaqstanda halyqty jappai vaktsinatsiialaý jumysy 2021 jyldyń aqpan aiyna josparlanǵan.
«Vaktsina Qazaqstandaǵy búkil meditsinalyq mekemege jetkiziletin bolady. Eń aldymen, erikti negizde meditsina qyzmetkerleri, pedagogter, stýdentter, quqyq qorǵaý organdarynyń, meditsinalyq-áleýmettik mekemelerdiń qyzmetkerleri, sonymen qatar sozylmaly aýrýlary bar táýekel topqa kiretin adamdar tegin ekpe alady», - dedi QR Densaýlyq saqtaý ministrliginiń Meditsinalyq jáne farmatsevtikalyq baqylaý komiteti tóraǵasynyń orynbasary Nurlybek Asylbekov.
Onyń atap ótýinshe, ázirshe, vaktsinanyń naqty quny aiqyndalǵan joq.
Eske salsaq, keshe QR Premer-Ministri Asqar Mamin Qaraǵandy farmatsevtikalyq keshenine baryp, «Spýtnik V» vaktsinasyn óndirýdi bastap berdi.
Aldyn ala boljamǵa sáikes, Qazaqstanda koronavirýsqa qarsy vaktsina 65 jastan asqan, júrek-qan tamyry aýrýy, qant diabeti jáne sozylmaly ókpe aýrýlary bar táýekel tobyna kiretin adamdarǵa jáne meditsina qyzmetkerlerine salynatyn bolady. Vaktsina alatyndardyń boljamdy sany 2 347 000 adamdy quraidy.
