Qazaqstanda koronavirýs juqtyrǵandar kúrt kóbeidi. 22 maýsymda 1248 adamnyń analizinen koronavirýs anyqtaldy. Bir kún buryn bul kórsetkish 943 bolǵan. Eki kún buryn 81 adamǵa koronavirýs pnevmoniiasy diagnozy qoiylǵan. 13 adam qaitys bolǵan: 12 adam - koronavirýstan, 1 adam koronavirýs pnevmoniiasynan kóz jumdy dep aitylady.
Osy aptada Qazaqstan densaýlyq saqtaý ministrligi elde koronavirýstyń "úndistandyq shtamyna" uqsaityn mýtatsiiasy anyqtaldy, synaq qorytyndysy shyqqannan keiin anyǵyn biletin bolamyz dep málimdegen. 22 maýsymda Nur-Sultan ákimdigi astanada qosymsha tekserý nátijeleri "úndistandyq shtamm" baryn kórsetti dep habarlady. Seisenbi kúni qalada karantindi kúsheitý týraly sheshim qabyldandy. 23 maýsymda Almaty qalasynyń sanitarlyq-epidemiologiialyq baqylaý departamenti de qalada "úndistandyq shtamm bar bolýy múmkin" dedi. Mamandardyń aitýynsha, "úndistandyq shtamm" koronavirýstyń kádimgi túrine qaraǵanda tez juǵady, aýrýdyń asqyný yqtimaldyǵy joǵary.
Qazir koronavirýs boiynsha "qyzyl aimaqta" turǵan Nur-Sultanda virýs kúsheigen. Resmi málimet boiynsha, ótken aptamen salystyrǵanda munda aýrý ósimi 43 paiyzǵa kóbeigen. 22 maýsymda astanada koronavirýc juqqan 413 naýqas anyqtaldy. Bul - respýblika boiynsha eń joǵary kórsetkish. Qaraǵandy oblysynda – 146, Almatyda 117 adamǵa Covid juqqan. Qalǵan oblystar men qalalarda bir táýlikte anyqtalǵan naýqastar júzge jetpeidi.
2020 jyldyń naýryz aiynan beri elde 411 771 adamnyń koronavirýs testi oń shyqqan. 4261-i qaitys bolǵan. Buǵan qosa, koronavirýs pnevmoniiasyna shaldyqqandar 56 627 adamǵa jetti. 3431-i kóz jumǵan dep aitylady. Elde koronavirýs pen koronavirýs pnevmoniiasyna shaldyqqandar bólek esepteledi. Biraq halyqaralyq uiymdardyń saitynda eki kórsetkish biriktirilgen.
Qazir 21 449 adam koronavirýstan emdelip jatyr. (20 myńnan astamynyń PTR testi oń shyqqan). Statsionarda 6325 adam emdelip jatyr. 15 124 adam ambýlatorlyq jaǵdaida emdelip júr. 413 adamnyń jaǵdaiy aýyr, 95 patsienttiń jaǵdaiy óte aýyr, 66 adam jasandy tynys apparatyna qosylǵan.
Qazaqstanda 2 mln 857 myń adam koronavirýsqa qarsy vaktsinanyń keminde bir dozasyn alǵan. 1 mln 753 myńy eki dozasyn alǵan. Azamattarǵa reseilik "Spýtnik V", qazaqstandyq QazVac jáne qytailyq Sinopharm jáne "Sinovac Biotech Ltd" kompaniiasynyń CoronaVac (Sinovac) vaktsinasy egilip jatyr.
Amerikalyq Djons Hopkins ýniversitetiniń dereginshe, indet bastalǵaly beri álemde 179 mln 107 myń adamnan koronavirýs anyqtalǵan. 3 mln 880 myń adam qaitys bolǵan.
Aimaqtar boiynsha ótken táýlikte koronavirýs anyqtalǵandar sany:
Nur-Sultan qalasy - 413
Almaty qalasy - 117
Shymkent qalasy - 64
Aqmola oblysy - 32
Aqtóbe oblysy - 32
Almaty oblysy - 28
Atyraý oblysy - 50
Shyǵys Qazaqstan oblysy - 70
Jambyl oblysy - 24
Batys Qazaqstan oblysy - 88
Qaraǵandy oblysy - 146
Qostanai oblysy - 30
Qyzylorda oblysy - 28
Mańǵystaý oblysy - 46
Pavlodar oblysy - 46
Soltústik Qazaqstan oblysy - 13
Túrkistan oblysy - 21
